சென்னை: சென்னை வியாசர்பாடி கணேசபுரம் ரயில்வே தண்டவாளம் அருகே பம்ப் செட் இருக்கும் இடத்தில் அடையாளம் தெரியாத ஆண் சடலம் இருப்பதாகப் புளியந்தோப்பு காவல் ஆய்வாளர் பிரவீன் குமாருக்கு தகவல் கிடைத்துள்ளது. இதையடுத்து சம்பவ இடத்திற்குச் சென்று காவல் துறையினர் சடலத்தைக் கைப்பற்றி ஆம்பூலன்ஸ் மூலம் ராஜீவ்காந்தி அரசு மருத்துவமனைக்குப் பிரேதப் பரிசோதனைக்காக அனுப்பி வைத்தனர்.
இது குறித்து புளியந்தோப்பு காவல் துறையினர் வழக்குப் பதிவு செய்து விசாரணை மேற்கொண்டனர். பின்னர் இந்த கொலை வழக்கு தொடர்பாக சூர்யா (24), அவரது கூட்டாளிகளான மணிகண்டன் (23), சாமுவேல் (19), மணிகண்டன் (20) ஆகிய 4 பேரைக் காவல் துறையினர் கைது செய்தனர். அவர்களிடமிருந்து 2 கத்திகள் பறிமுதல் செய்யப்பட்டன.
தொடர்ந்து இவர்களிடம் நடத்திய விசாரணையில் கைது செய்யப்பட்ட சூர்யாவின் உறவினர் கிரி என்பவர் இறந்து போனதும், அவரது மறைவிற்கு சீனு வராததால், அவர் மீது சந்தேகம் ஏற்பட்டு, சீனுவை கொலை செய்ய சூர்யா திட்டமிட்டு, தனது நண்பர்களுடன் சேர்ந்து கொலை செய்தது தெரியவந்தது. இந்த கொலை வழக்கில் தலைமறைவாக உள்ள மேலும் 2 பேரை தனிப்படை அமைத்து காவல்துறையினர் தேடி வருகின்றனர்.