தங்கச் சங்கிலியை பறிக்க முயன்ற சம்பவம் - தம்பதியினர் காயம்!

சென்னை:  திருவொற்றியூர் எண்ணூர் விரைவு சாலையில் இருசக்கர வாகனத்தில் கணவருடன் சென்ற பெண்ணிடம்,  அடையாளம் தெரியாத நபர்கள் தங்கச் சங்கிலியைப் பறிக்க முயன்றபோது,  கீழே விழுந்து படுகாயமடைந்த  சம்பவம் அப்பகுதியில் பரபரப்பை ஏற்படுத்தியது

திருவொற்றியூர் ராஜா கடை பகுதியைச் சேர்ந்தவர் ராஜ்குமார். இவர் அதே பகுதியில் ஃபேன்சி ஸ்டோர் நடத்திவருகிறார். இவரது மனைவி மீனாவுடன் அருகில் உள்ள உறவினர்கள் வீட்டு கிரக பிரவேசத்திற்குச் சென்றுவிட்டு, தனது தந்தை நினைவு நாள் நிகழ்ச்சிக்குச் செல்வதற்காகக் கணவருடன் இருசக்கர வாகனத்தில் கேவிகே குப்பம் அருகே சென்றிருந்தார்.

அப்போது, இருசக்கர வாகனத்தில் தலைக்கவசம் அணிந்தபடி பின்னால் வந்த இருவர் மீனாவின் கழுத்தில் இருந்த 21 பவுன் தங்க நகையைப் பறிக்க முயன்றனர். உடனே சுதாரித்துக் கொண்ட மீனா கொள்ளையனை கையோடு சேர்த்து நகைகளைப் பிடித்துக் கொண்டார். இதனால், கொள்ளையர்கள் கணவன் மனைவி இருவரையும் இருசக்கர வாகனத்திலிருந்து கீழே தள்ளி விட்டுத் தப்பிச் சென்றுவிட்டனர். இதில் கணவன் மனைவி இருவரும் பலத்த காயம் அடைந்தார்.

சிகிச்சை பெற்றுவரும் ராஜ்குமார்

அந்த வழியாக வந்தவர்கள் பலத்த காயத்துடன் கீழே விழுந்து கிடந்த கணவன் மனைவி இரண்டு பேரையும் மீட்டு அருகில் இருந்த தனியார் மருத்துவமனையில் அனுமதித்தனர். இதனையடுத்து கணவன் மனைவி இருவரும் தீவிர சிகிச்சைப் பிரிவில் அனுமதிக்கப்பட்டு சிகிச்சை அளிக்கப்பட்டுவருகிறது.

இச்சம்பவம் குறித்து திருவொற்றியூர் காவல் துறையினர் வழக்குப்பதிவு செய்து எண்ணூர் கடற்கரைச் சாலையில் வைக்கப்பட்டுள்ள சிசிடிவி கேமரா பதிவுகளை ஆராய்ந்துவருகின்றனர்.