சென்னை:சன் பிக்சர்ஸ் நிறுவனம் தயாரிப்பில் நெல்சன் திலீப்குமார் இயக்கத்தில் சூப்பர்ஸ்டார் ரஜினிகாந்த் நடித்துள்ள ஜெயிலர் திரைப்படம் இன்று (ஆகஸ்ட் 10) வெளியாகி ரசிகர்கள் மத்தியில் மிகுந்த வரவேற்பைப் பெற்று வருகிறது. இப்படத்திற்கு அனிருத் இசையமைத்துள்ளார்.
மேலும் இப்படத்தில் தென்னிந்திய பிரபலங்களான தமன்னா, மோகன் லால், சிவராஜ் குமார், ஜாக்கி ஷெராஃப், உள்ளிட்டோர் நடித்துள்ளனர். இந்நிலையில் படத்தைப் பார்த்த ரசிகர்கள் ரஜினிக்கு இதற்கு முன் வெளியான படங்களில் இருந்து இப்படம் நிச்சயம் வேறுபட்டு இருப்பதாகவும், நெல்சன் சம்பவம் செய்துள்ளார் என்றும், இருவருக்கும் இப்படம் கம்பேக் படமாக இருக்கும் என்றும் விமர்சனம் செய்து வருகின்றனர்.
இந்த நிலையில் படத்தைப் பார்த்த திரைப்பிரபலங்கள் பலரும் தங்களது கருத்துகளை சமூக வலைத்தளங்களில் பதிவிட்டு வருகின்றனர். இயக்குநர் வெங்கட் பிரபு மற்றும் இசையமைப்பாளர் அனிருத் 'தலைவர் நிரந்தரம்' என்று பதிவிட்டுள்ளார். இப்படத்தில் ரஜினியின் மகனாக நடித்த வசந்த் ரவி, ஜெயிலர் எனது திரை வாழ்வில் மிக முக்கியமான மைல்ஸ்டோன் என்றும்; என்மேல் நம்பிக்கை வைத்த நெல்சன் மற்றும் ரஜினிகாந்துக்கு நன்றி எனவும், இன்று முதல் உங்களை அப்பா என்று அழைக்கிறேன் என்ற நெகிழ்ச்சிப் பதிவை செய்துள்ளார்.
இதையும் படிங்க:ஜெயிலர் திரைப்படம் வெற்றி பெற சிறப்பு வழிபாடு செய்த ரஜினி ரசிகர்கள்!