மது போதையில் வாகனத்தை இயக்கிய நபர்.. கார்-பைக் நேருக்கு நேர் மோதி விபத்து!

Bike car accident: வண்டலூர்-மீஞ்சூர் பைபாஸ் சாலையில் கார், இருசக்கர வாகனம் நேருக்கு நேர் மோதியதில் இருசக்கர வாகனத்தில் சென்ற இளைஞர் தூக்கி வீசப்பட்டு உயிருக்கு ஆபத்தான நிலையில் தீவிர சிகிச்சை பிரிவில் அனுமதிக்கப்பட்டு உள்ளார்.

சென்னை:தாம்பரம் அடுத்த வண்டலூர்-மீஞ்சூர் பைபாஸ் சாலையில், தருமபுரி மாவட்டத்தைச் சேர்ந்த வசந்தகுமார் (26) என்பவர், மீஞ்சூரில் இருந்து வண்டலூர் நோக்கி இருசக்கர வாகனத்தில் வந்து கொண்டு இருந்துள்ளார். அப்பொழுது, வண்டலூர் அருகே சொகுசு காரில் மீஞ்சூரில் இருந்து வண்டலூர் நோக்கி செல்லக் கூடிய பைபாஸ் சாலையின் சர்வீஸ் சாலை வழியாக எதிர்ப்புறமாக வரும்போது, போக்குவரத்து போலீசார் கார் ஓட்டி வந்த நபரை தடுத்து நிறுத்தி உள்ளனர்.

அப்போது போலீசாரை இடிப்பதுபோல் கார் வந்ததால், போலீசார் அதனை விட்டு விலகியுள்ளார். இதனையடுத்து, காரை ஓட்டி வந்த நபர் அதிவேகத்தில் சென்றதால், பைபாஸ் சாலையில் வந்த இருசக்கர வாகனத்தின் மீது நேருக்கு நேர் மோதி, வாகனத்தை ஓட்டி வந்த வசந்தகுமார் தூக்கி வீசப்பட்டார்.

அதன் பிறகு, அங்கிருந்த போக்குவரத்து போலீசார் உடனடியாக ஆம்புலன்ஸ் மூலம் தாம்பரத்தில் உள்ள தனியார் மருத்துவமனையில் வசந்த குமாரை சிகிச்சைக்காக அனுப்பி வைத்தனர். மேலும், இது குறித்து கூடுவாஞ்சேரி போக்குவரத்து புலனாய்வு போலீசார் வழக்குப் பதிவு செய்து விசாரணை மேற்கொண்டு வருகின்றனர்.

இதன் முதற்கட்ட விசாரணையில், வாகனத்தை ஒட்டி வந்த நபர் ஐடி நிறுவனத்தில் பணிபுரிந்து வரும் திவாகர் ஷங்கர் என்பதும், அதிக மது போதையில் காரை அதிவேகமாகவும், சாலையில் எதிர்புறமாக வந்து விபத்தை ஏற்படுத்தியதும் தெரிய வந்துள்ளது. இது குறித்து போலீசார் விசாரணை மேற்கொண்டு வருகின்றனர்.

இதையும் படிங்க:கேரள போலீசாரால் தேடப்பட்டு வந்த தலைமறைவு குற்றவாளி சென்னையில் கைது!