’நாளை நமதே’ நூல் வெளியீட்டு விழா; அமைச்சர் பங்கேற்பு!

சென்னை: அடையாறில் உள்ள தனியார் கல்லூரியில் நடைபெற்ற ‘நாளை நமதே’ என்னும் நூல் வெளியீட்டு விழாவில் தமிழ் பண்பாடு மற்றும் தொல்லியல் துறை அமைச்சர் மாஃபா பாண்டியராஜன் கலந்து கொண்டார்.

சென்னை அடையாறில் உள்ள தனியார் கிறிஸ்தவ கல்லூரியில் நடைபெற்ற ‘நாளை நமதே’ என்னும் நூல் வெளியீட்டு விழாவில், தமிழ் பண்பாடு மற்றும் தொல்லியல் துறை அமைச்சர் மாஃபா பாண்டியராஜன் கலந்துகொண்டார். கிறிஸ்தவ பாதிரியார் ஜான்சன் எழுத்தில் உருவாகியுள்ள இந்நூலை அவரே வெளியிட, அதை தமிழக அமைச்சர் மாஃபா பாண்டியராஜன் பெற்றுக்கொண்டார்.

பின்னர் பேசிய பாதிரியார் ஜான்சன், இந்த நூல் என் வாழ்க்கையில் பார்த்த இளைஞர்களின் அனுபவங்களை அடிப்படையாகக் கொண்டு சாதி மத அடையாளம் இல்லாமல் ஒரு இளைஞன் தன் வாழ்க்கையை எப்படி வாழவேண்டும் என்றும், இளைஞர்களின் வாழ்க்கையில் ஏற்படும் மன வலி மற்றும் தோல்விகளை எப்படி எதிர்கொள்வது என்றும் என் சுய சிந்தனையால் உருவாக்கியுள்ளேன். எனக்கு எம்ஜிஆரை மிகவும் பிடிக்கும் என்பதால் இந்நூலுக்கு ‘நாளை நமதே’ என பெயர் வைத்தேன் என்றார்.

விழா முடிந்து செய்தியாளர்களை சந்தித்த அமைச்சர் மாஃபா பாண்டியராஜன், பாதிரியார் ஜான்சன் எழுதிய நூலை நான் படித்தேன். இது இளைஞர்களுக்கு எதிர்கால வாழ்க்கையையும், இந்திய ஒருமைப்பாட்டையும் உணரவைக்கும் என்று கூறினார்.

வேலூர் தேர்தல் பற்றிய கேள்விக்கு, முதல்வர் மற்றும் துணை முதல்வர் மிகுந்த கவனத்துடன் செயல்படுகின்றனர். அமைச்சர்கள் கடினமாக உழைக்கிறார்கள், பிரசாரங்களில் ஈடுபடும் வேளையில் மக்களின் வரவேற்பை பார்க்கும்போது தேர்தல் எங்களுக்கு சாதகமாகவே அமையும் என்பது நிச்சயம். நாங்கள்தான் வெற்றிபெறுவோம் என தெரிவித்தார்.