நடிகர் சூர்யாவுக்கு பாஜக எச்சரிக்கை!

சென்னை: புதிய கல்விக் கொள்கை குறித்த கருத்து உலகம் முழுவதும் செல்கிறது, பேசுவதற்கு முன் சிந்தித்து பேசவும் என்று நடிகர் சூர்யாவை பாஜக எச்சரித்துள்ளது.

பாஜகவின் மாநிலப் பொருளாளர் எஸ்.ஆர். சேகர் வெளியிட்டுள்ள அறிக்கையில், "புதிய கல்விக் கொள்கை பற்றி சரமாரியாக எதிர்மறைக் கருத்துகளை நடிகர் சூர்யா தெரிவித்துள்ளார். சூர்யாவிடம் நான் கேட்கும் சில கேள்விகளுக்கு அவர் பதிலளிப்பாரா?

• முதலில் வரைவுக் கொள்கை 448 பக்கங்களையும் படித்துவிட்டாரா?
• படித்த பிறகு உங்கள் சந்தேகங்களை தெளிவுபடுத்திக் கொண்டீர்களா? பிறகுதான் இந்தக் கருத்தை தெரிவித்தீர்களா? உங்களுடைய குற்றச்சாட்டுகள் பொய்யானது; மக்களை திசை திருப்புவது என்று குற்றம்சாட்டுகிறேன்.
• பள்ளிக் கல்வியில் 3, 5, 8ஆம் வகுப்பில் பொதுத் தேர்வு அது அநீதி என குரல் கொடுக்கும் நடிகர் சூர்யாவிற்கு அது பாஸ், பெயிலுக்கான தேர்வு இல்லை என்பது தெரியுமா?
• கடந்த இரண்டு ஆண்டுகளாக 'நீட்' தேர்வு மூலமாக மிகவும் பின்தங்கிய மாவட்டம், பின்தங்கிய சமூகத்தைச் சேர்ந்த அரசுப் பள்ளி, சமச்சீர் கல்வி மாணவர்கள் வெற்றி பெற்றிருக்கிறார்கள் என்பது உங்களுக்குத் தெரியுமா சூர்யா?

அகரம் ஃபவுண்டேஷன் மூலம் கிராமப்புற மாணவர்களை மருத்துவராக மாற்றியதாக நீங்கள் சொல்வதோடு நிறுத்திக் கொள்ளவும், அதை 'நீட்' தேர்வோடு ஒப்பிடுவது உங்கள் அறிவீனத்தை காட்டிக் கொள்ளாதீர்கள். உங்களுடைய கருத்து உலகம் முழுதும் உடனே சென்றடையும். எனவே சிந்தித்து உண்மையை உறுதி செய்து கொண்டு பேசவும். இதை வேண்டுகோளாக எடுத்தாலோ, இல்லை எச்சரிக்கையாக எடுத்தாலோ" சரி என்று அதில் கூறியுள்ளார்.