'கோயில்களில் இன்று முதல் அன்னதானம்'

அன்னதானம் வழங்கப்படும் அனைத்துத் திருக்கோயில்களிலும் வழக்கம்போல, அன்னதானக் கூடங்களில் தகுந்த இடைவெளியுடன் பக்தர்களுக்கு இலையில் இன்று முதல் உணவு பரிமாறப்படும் என இந்து சமய அறநிலையத் துறை அமைச்சர் சேகர்பாபு அறிவித்துள்ளார்.

சென்னை:இந்து சமய அறநிலையத் துறை சார்பில் தமிழ்நாடு முழுவதும் 754 திருக்கோயில்களில், தரிசனத்திற்கு வருகைதரும் பக்தர்களுக்கு அன்னதானம் வழங்கப்பட்டுவருகிறது.

பழனி அருள்மிகு தண்டாயுதபாணி சுவாமி திருக்கோயில், ஸ்ரீரங்கம் அருள்மிகு அரங்கநாத சுவாமி திருக்கோயில்களில் நாள் முழுவதும் அன்னதானம் திட்டம் செயல்பாட்டில் இருந்துவருகிறது.

கடந்த 16ஆம் தேதி தமிழ்நாடு முதலமைச்சர், திருச்செந்தூர் அருள்மிகு சுப்ரமணிய சுவாமி திருக்கோயில், சமயபுரம் அருள்மிகு மாரியம்மன் திருக்கோயில், திருத்தணி அருள்மிகு சுப்ரமணியசுவாமி திருக்கோயில் ஆகிய மூன்று திருக்கோயில்களில் நாள் முழுதும் அன்னதானத் திட்டத்தினைத் தொடங்கிவைத்தார். இத்திட்டம் பக்தர்களிடையே வரவேற்பைப் பெற்றுள்ளது.

கரோனா பெருந்தொற்று காரணமாக திருக்கோயில்களில் வழங்கப்படும் அன்னதானம் இலையில் பரிமாறப்படாமல் உணவுப்பொட்டலங்களாக அனைத்து நாள்களிலும் (வெள்ளி, சனி, ஞாயிறு உள்பட) பக்தர்களுக்கு வழங்கப்பட்டுவருகின்றன.

இந்த நடைமுறையினை மாற்றி பின்வரும் முறையில் அன்னதானம் திருக்கோயில்களில் இன்றுமுதல் (செப். 20) வழங்கப்படும். திங்கள்கிழமை முதல் வியாழக்கிழமை வரை அன்னதானம் வழங்கும் அனைத்துத்திருக்கோயில்களிலும் அன்னதானக் கூடங்களில் தகுந்த இடைவெளியுடன் பக்தர்களுக்கு அன்னதானம் இலையில் பரிமாறப்படும் என அரசின் சார்பில் தெரிவிக்கப்பட்டுள்ளது.