எட்டு வழிச்சாலை தீர்ப்பு குறித்து எம்எல்ஏ கருணாஸ் வெளியிட்ட அறிக்கையில் கூறியுள்ளதாவது,
சென்னை- சேலம் இடையே 5 மாவட்டங்கள் வழியாக, ரூ.10 ஆயிரம் கோடி செலவில் 8 வழிச்சாலை அமைக்க மத்திய அரசு திட்டமிட்டது. இத்திட்டத்திற்கு தடை விதிக்க கோரிய வழக்கில் இன்று நீதிமன்றம் தடை விதித்து உத்தரவிட்டுள்ளது. இது விவசாயிகளுக்கும், பொதுமக்களுக்கும் கிடைத்த வெற்றி.
எட்டு வழிச்சாலை திட்டத்திற்காக சுமார் 1,900 ஹெக்டர் நிலம் கையகப்படுத்தப்பட இருப்பதாக அறிவிக்கப்பட்ட நிலையில் சுற்றுச்சூழல் அமைச்சகத்தின் அனுமதி பெறுவதற்கு முன்பே நிலம் அளவிடும் பணிகள் வேக வேகமாக தொடங்கப்பட்டன. எட்டுவழிச்சாலை திட்டத்தை எதிர்த்து, விவசாயிகளும், பொதுமக்களும், பல்வேறு அமைப்புகளும் தொடர்ந்து போராட்டம் நடத்தினர். ஐந்து மாவட்ட விவசாயிகள் சார்பில் சென்னை உயர்நீதிமன்றத்தில் வழக்கு தொடரப்பட்டன.
அதன் விளைவாக தமிழக அரசு செயல்படுத்த நினைத்த எட்டுவழிச்சாலை தொடர்பான அனைத்து நடவடிக்கைகளுக்கும் உயர் நீதிமன்றம் தடை விதித்துள்ளது. அதோடு மட்டுமின்றி கையகப்படுத்தப்பட்ட நிலங்களை மீண்டும் நில உரிமையாளர்களுக்கே பத்திரப்பதிவு செய்து கொடுக்க நீதிமன்றம் உத்தரவு பிறப்பித்துள்ளது. இந்த தீர்ப்பு வரவேற்கத்தக்கது.
வருகின்ற மக்களவைத் தேர்தல் பரப்புரை கூட்டங்களில் அதிமுக, பாஜக உள்ளிட்ட கூட்டணிக் கட்சி தலைவர்கள் எட்டுவழிச்சாலை திட்டத்தை அமல்படுத்தியே தீருவோம் என முழங்கிக் கொண்டிருக்கின்ற வேளையில் இத்தீர்ப்பை மக்களுக்கு ஆதரவாக நீதிமன்றம் வழங்கியுள்ளது.
இந்த திட்டத்தை நிறைவேற்ற நினைத்தவோர்களோடு கூட்டணி வைத்துக் கொண்டுள்ள கட்சிகள், இந்த திட்டத்திற்கு தடை விதிக்க நாங்கள்தான் போராடினோம் என்று தேர்தல் நேரத்தில் பேசினால் மக்கள் சிரித்து விடுவார்கள். ஆகவே இது மக்கள் போராட்டத்திற்கான வெற்றி. இதை தனிநபர் யாரும் உரிமைகோரி அதை வாக்குகளாக மாற்றிட முயற்சி செய்தால் அதைவிட இழிவானச் செயல் வேறொன்றும் கிடையாது, என்று குறிப்பிட்டுள்ளார்.
