சென்னை: செம்படம்பர் ஐந்தாம் தேதி அன்று இந்தியா முழுவதும் ஆசிரியர் தினம் கொண்டாடப்பட்டு வருகிறது. இந்த நிலையில் தமிழ் சினிமாவில் இதுவரை வந்த ஆசிரியர்கள் பற்றி வெளியான சில படங்களை பார்க்கலாம். எத்தனையோ தமிழ் சினிமாக்கள் ஆசிரியர் பணியை குறித்து வந்திருந்தாலும், ரசிகர்கள் பட்டாளம் பெற்ற நடிகர்கள் ஆசிரியராக நடித்தால் அது எப்போதும் ஸ்பெஷல் தான். அப்படி ரசிகர்களுக்கு பிடித்தமான ஆசிரியர்களில் முதன்மையானவராக திகலக்கூடியவர் 'நம்மவர்' கமல்.
1994ம் ஆண்டு கே.எஸ்.சேதுமாதவன் இயக்கத்தில் வெளியான இப்படம், இப்போது வரையிலும் சிறந்த படமாக கொண்டாடப்படுகிறது. ஒரு ஆசிரியர் புத்தக பாடத்தை மட்டும் மாணவர்களுக்கு கற்றுத் தராமல், புத்தகத்தை தாண்டிய பாடத்தை கற்பித்தக் குறித்து இப்படம் பேசியது. பாலின பாகுபாடுகள் பற்றியும், கல்லூரியில் நிலவும் ரவுடியிசம் செய்யும் மாணவர்கள் மனநிலை அறிந்து அவர்களை கையால்வது என, 'நம்மவர்' படத்திக் நடிகர் கமல் அனைவரையும் ரசிக்க வைத்திருப்பார்.
மாணவர்கள், ஆசிரியர்கள் என அனைவருக்கும் பாடம் கற்பித்த சாட்டை தயா சார்: சமுத்திரக்கனி நடிப்பில், பிரபு சாலமோன் தயாரிப்பில் வெளியான படம் 'சாட்டை'. இயக்குநர் அன்பழகன் இயக்கத்தில் உருவான இப்படமும் மாணவர்களின் வாழ்க்கையை பற்றி பேசியது. பள்ளியில் மாணவர்களுக்குள் இருக்கும் மதிப்பெண் போட்டி, ஒழுக்கம், பாலின பாகுபாடு பற்றி இப்படம் கொஞ்சம் அழுத்தமாகவே பேசியது.
தயாளன் என்ற கதாபாத்திரத்தில் சமுத்திரக்கனி ஒரு நல்ல ஆசிரியர் எப்படி இருக்க வேண்டும் என்பதை கண்முன் நிறுத்தி இருப்பார். ஆசிரியர்களுக்குள் இருக்கும் அசட்டுத்தனம், மாணவர்கள் மீது அக்கறை இன்றி வேலை செய்யும் ஆசிரியர்கள் என இப்படத்தில் காட்டப்பட்டிருந்தது. மதிப்பெண் கடந்து மாணவர்களுக்கு என்ன திறமை இருக்கிறது என்பதை கண்டுபிடித்து அவர்களை ஊக்குவிக்க வேண்டும் என்ற கருத்தையும் இப்படம் ஆழமாக பேசியது.
விருது வாகை சூடிய சிறப்பான படைப்பு: இயக்குநர் சற்குணம் இயக்கத்தில், விமல் நடிப்பில் வெளியான மிக சிறந்த படம் 'வாகை சூட வா'. கல்வி ஒரு மனிதனுக்கு எத்தனை முக்கியம் என்பதை அழகான திரைக்கதையுடன் சொல்லியிருந்தார் இயக்குனர் சற்குணம். செங்கல் சூளையில் வெந்து கிடக்கும் மக்கள் எப்படி முதலாளித்துவத்தால் சுரண்டப்படுகிறார்கள், கல்வி எப்படி அடிமை விலங்கை உடைத்தெறியும் ஆயுதமாக மாறுகிறது என்பதை அழகாக காட்டிய படம்.
"எம்புள்ளைக்கு எதையாச்சும் சொல்லிக் குடுயா" என்று படத்தில் ஆசிரியராக நடித்திருந்த விமலிடம் ஒரு தாய் வந்து கேட்கும் இடம் கல்வியின் முக்கியத்துவத்தை உணர்த்தும் காட்சியாக அமைந்தது. இப்படத்தின் சிறந்த காட்சிகளை பற்றி சொல்ல வேண்டுமென்றால் பட்டியலிட்டு கொண்டே போகலாம்.
குறிப்பாக படத்தின் இருதியில், செங்கல் சூலையை சார்ந்தவர்கள் அவர்களை ஏமாற்ற முயன்று, தவராக கணக்கு சொல்லும் போது அப்பகுதி சிறுவர்களே சரியாக கணக்கிடுவது என படத்தின் திரைக்கதை மிக அழகாக அமைந்திருந்தது. குறிப்பாக இசையமைப்பாளர் ஜிப்ரானின் இசை படத்தின் ஒவ்வோரு காட்சிகளையும் மெருகூட்டியது. இப்படம் அந்த ஆண்டு சிறந்த தமிழ் படத்திற்கான் தேசிய விருதை பெற்றது.
மனமாற்றத்திற்கு வழி வகுத்த தங்க மீன்கள்:இயக்குநர் ராம் இயக்கத்தில் வெளிவந்த படம் தங்க மீன்கள். தந்தை மகள் பாசத்தை மையமாக கொண்டு உருவான இப்படம், மாணவர்கள் சிறந்து நிலையில் முன்னேற்றம் அடைய ஆசிரியர்களின் ஊக்கம் எவ்வளவு முக்கியம் என்பதை இப்படம் பேசியது.
குழந்தைகளின் வாழ்க்கை சிறக்க படிக்கும் பள்ளியை விட, பாடம் கற்பிக்கும் ஆசிரியர்கள் தான் முக்கியம் என்பதை தங்க மீன்கள், அனைவருக்கும் பாடம் புகட்டியது. இப்படம் வெளியான சமயத்தில் பலர் ஆசிரியர்கள், பெற்றோர்கள் என அனைவருக்கும் மன மாற்றத்தை அளித்தது குறிப்பிடத்தக்கது.
தைரியமளித்த ராட்சசி: கௌதம்ராஜ் இயக்கத்தில், ஜோதிகா நடிப்பில் வெளியான படம் 'ராட்சசி'. கிட்டத்தட்ட சமுத்திரக்கனி நடித்த சாட்டை படத்தின் கதை சாயலை கொண்டிருக்கும். பின்தங்கிய நிலையில் இருக்கும் பள்ளியை எப்படி நம்பர் ஒன் பள்ளியாக மாற்றுகிறார் என்பது தான் இப்படத்தின் கதை. படத்தில் ஜோதிகா தலைமை ஆசிரியராக நன்றாக நடித்திருப்பார்.