சென்னையில்நள்ளிரவில் கொட்டித் தீர்த்த கனமழை காரணமாக சென்னை விமான நிலையத்தில் தரையிறங்க முடியாமல் ஃபிராங்க்பர்ட், டெல்லி, கொல்கத்தா ஆகிய 3 விமானங்கள் பெங்களூர் திரும்பிச் சென்றதோடு, 8 விமானங்கள் தரையிறங்க தாமதமாகின. இதனால் பயணிகள் கடும் அவதி அடைந்தனர்.
சென்னை மற்றும் புறநகர் பகுதிகளில் நள்ளிரவில் இருந்து இன்று அதிகாலை வரை இடி மின்னல், சூறைக்காற்றுடன் பெய்த பலத்த மழை காரணமாக, சென்னை விமான நிலையத்தில் விமான சேவைகள் பெருமளவு பாதிக்கப்பட்டன. டெல்லியில் இருந்து 154 பயணிகளுடன் இண்டிகோ ஏர்லைன்ஸ் பயணிகள் விமானம் நேற்று நள்ளிரவு 11:35 மணிக்கு, சென்னை உள்நாட்டு விமான நிலையத்தில் தரை இறங்க வந்தது.
அந்த நேரத்தில் பலத்த சூறைக்காற்று மற்றும் இடி மின்னலுடன் கூடிய கனமழை பெய்து கொண்டிருந்ததால், விமானம் தரை இறங்க முடியாமல், பெங்களூருவிற்கு திருப்பி அனுப்பப்பட்டது. அதை போல் ஜெர்மன் நாட்டின் ஃபிராங்க்பர்ட் நகரில் இருந்து 268 பயணிகளுடன், நள்ளிரவு 12:05 மணிக்கு சென்னை சர்வதேச விமான நிலையத்தில் தரை இறங்க வந்த லுப்தான்ஷா ஏர்லைன்ஸ் பயணிகள் விமானமும், சென்னையில் தரையிறங்க முடியாமல் பெங்களூர் திரும்பிச் சென்றது.