மாமல்லபுரத்தில் இன்றுமுதல் பார்வையாளர்களுக்கு அனுமதி!

செங்கல்பட்டு: புகழ்பெற்ற சுற்றுலாத் தலமான மாமல்லபுரத்தில் இன்றுமுதல் பார்வையாளர்கள் அனுமதிக்கப்படுவதால், மாமல்லபுரம் மீண்டும் களைகட்டத் தொடங்கியுள்ளது.

செங்கல்பட்டு மாவட்டத்தில் உள்ள மாமல்லபுரம் உலகப் புகழ்பெற்ற வரலாற்றுச் சுற்றுலாத் தலமாகும். தமிழ் மன்னர்களின் கட்டடக்கலைக்கு மிகச் சிறந்த எடுத்துக்காட்டாக விளங்கும் இந்தச் சுற்றுலாத் தலம், பிரதமர் மோடி, சீனப் பிரதமர் ஜி ஜின்பிங் சந்திப்புக்குப் பிறகு சர்வதேச கவனத்தையும் ஈர்த்தது. இதனால், தினந்தோறும் ஆயிரக்கணக்கான சுற்றுலாப் பயணிகள் இங்கு வந்துசெல்வது வாடிக்கையாக இருந்துவந்தது.

கரோன பாதிப்பால், கடந்த ஒன்பது மாதங்களாகப் பார்வையாளர்களுக்கு அனுமதி மறுக்கப்பட்டுவந்த நிலையில், தற்போது கட்டுப்பாடுகளுடன் பார்வையாளர்கள் இன்றுமுதல் அனுமதிக்கப்படுவர் என தொல்லியல் துறை அறிவித்தது. இதனையடுத்து, இன்று (டிச. 14) பார்வையாளர்கள் வருகை தொடங்கியுள்ளது.

இனிவரும் நாள்களில் பார்வையாளர்கள் எண்ணிக்கை அதிகரிக்கும் என்றாலும், ஒரு நாளைக்கு இரண்டாயிரம் பார்வையாளர்கள் மட்டுமே அனுமதிக்கப்படுவர். பார்வையாளர்கள் முகக்கவசம் அணிந்து வர அறிவுறுத்தப்பட்டுள்ளனர்.

அதுமட்டுமின்றி, கரோனா சோதனை மேற்கொள்ளப்பட்ட பிறகே அனுமதிக்கப்படுவர். இணைய தளம் வழியாக அனுமதிச் சீட்டினைப் பதிவுசெய்து கொள்ளலாம். மேலும், 60 வயதுக்கு மேலுள்ள முதியோருக்கும், 10 வயதுக்குள்பட்ட குழந்தைகளுக்கும் அனுமதி இல்லை எனத் தொல்லியல் துறை தெரிவித்துள்ளது.

இதையும் படிங்க...டெல்லியில் விவசாயிகள் இன்று உண்ணாவிரதம்!