ஷாங்காய் மாஸ்டர்ஸ் ஓபன் டென்னிஸ் தொடர் சீனாவில் நடைபெற்று வருகிறது. இந்தத் தொடரின் காலிறுதி ஆட்டம் இன்று நடைபெற்றன. அதில் நட்சத்திர வீரர்களான ஃபெடரர், ஜோகோவிச் ஆகியோரின் ஆட்டம் நடைபெறும் என்பதால் இன்று டென்னிஸ் ரசிகர்களிடையே பெரும் எதிர்பார்ப்பு இருந்தது.
இதன் முதல் காலிறுதி ஆட்டத்தில் ஜோகோவிச்சை எதிர்த்து 21 வயதேயான சிட்சிபாஸ் ஆடினார். இந்த ஆட்டத்தின் முதல் செட்டை அனுபவ வீரர் ஜோகோவிச் 6-3 என கைப்பற்ற, இரண்டாவது செட் ஆட்டத்தில் சிட்சிபாஸ் தனது திறமையை வெளிப்படுத்தினார்.
இரண்டாவது செட்டை 7-5 என சிட்சிபாஸ் கைப்பற்ற, ஆட்டத்தில் சிறிது நேரம் பரபரப்பு ஏற்பட்டது. அதையடுத்து நடைபெற்ற மூன்றாவது செட் ஆட்டத்தில் அனுபவம் வாய்ந்த ஜோகோவிச்சை சிட்சிபாஸ் தனது அதிரடியான ஷாட்களால் திணறடித்தார். கடைசி செட்டை 6-3 என கைப்பற்றிய சிட்சிபாஸ், உலகின் நம்பர் ஒன் வீரரான ஜோகோவிச்சை வீழ்த்தி ஷாங்காய் மாஸ்டர்ஸ் டென்னிஸ் தொடரின் அரையிறுதிக்கு முன்னேறினார்.