புரோ கபடி 2019 தொடரின் லீக் போட்டிகள் தற்போது டெல்லியில் நடைப்பெற்று வருகிறது. இதில் நேற்று நடைபெற்ற 58-ஆவது லீக் போட்டியில் பெங்களூரு புல்ஸ் அணியும், ஜெய்பூர் பிங்க் பேந்தர்ஸ் அணியும் மோதின.
ஆரம்பம் முதலே அதிரடி காட்டிய பெங்களூரு அணி முதல் பத்து நிமிடங்களுக்குள்ளாகவே 9-4 என்ற கணக்கில் முன்னிலை பெற்றது. அதன்பின் களமிறங்கிய பெங்களூரு அணி ரோகித் குமார் ’சூப்பர் ரைடு’ முறையில் எதிரணியை ஆல் அவுட் செய்தார்.
இதன்மூலம் முதல் பாதி முடிவில் பெங்களூரு புல்ஸ் அணி 22-8 என்ற கணக்கில் ஜெய்பூர் அணியை விட முன்னிலையில் இருந்தது. இந்நிலையில் ஆட்டத்தின் இரண்டாவது பாதியில் தனது ஆக்ரோஷ ஆட்டத்தைத் தொடங்கிய இரு அணி வீரர்களும் மாறி மாறி புள்ளிகளை சேர்க்க, ஆட்டம் அனல் பறந்தது.
இறுதியில் 41-30 என்ற புள்ளிக் கணக்கில் பெங்களூரு புல்ஸ் அணி, ஜெய்பூரின் பிங்க் பேந்தர்ஸ் அணியை வீழ்த்தியது. பெங்களூரு அணியின் ரோஹித் குமார் 13 புள்ளிகளைப் பெற்று அணியின் வெற்றிக்கு உதவினார்.
