சீரி ஏ கால்பந்து தொடர் இத்தாலியின் பல்வேறு நகரங்களில் நடைபெற்றுவருகிறது. இதில் இன்று (ஜன. 11) நடைபெற்ற லீக் ஆட்டத்தில் ஜுவென்டஸ் அணி - சசுவோலோ அணியை எதிர்கொண்டது.
பரபரப்புடன் தொடங்கிய இப்போட்டியின் முதல் பாதி ஆட்டத்தில் இரு அணி வீரர்களும் வலிமையான டிஃபென்ஸ் ஆட்டத்தை வெளிப்படுத்தினர். இதனால் முதல் பாதி ஆட்டம் கோலேதுமின்றி சமனில் முடிந்தது.
பின்னர் தொடங்கிய இரண்டாம் பாதி ஆட்டத்தில் ஜுவென்டஸ் அணியின் டனிலோ ஆட்டத்தின் 50ஆவது நிமிடத்தில் கோலடித்தார். இதற்குப் பதிலடி கொடுக்கும்வகையில் சசுவோலோ அணியின் கிரேகோயர் டிஃப்ரல் ஆட்டத்தின் 58ஆவது நிடத்தில் கோலடித்தார்.
அதன்பின் அசத்தலான ஆட்டத்தை வெளிப்படுத்திய ஜுவென்டஸ் அணியின் ஆரோன் ரம்செய் 82ஆவது நிமிடத்தில் கோலடித்து அணியின் வெற்றியை உறுதிசெய்தார். பிறகு ஆட்டத்தில் கிடைத்த கூடுதல் நேரமான 90+2ஆவது நிமிடத்தில் கேப்டன் கிறிஸ்டியானோ ரொனால்டோ கோலடித்து அணிக்கு வெற்றியைத் தேடித்தந்தார்.