திருநெல்வேலி: தமிழ்நாடு பிரீமியர் லீக் எனப்படும் டிஎன்பிஎல் டி20 தொடரின் ஆறாவது சீசன் திருநெல்வேலி சங்கர் நகர் இந்தியா சிமெண்ட்ஸ் கிரிக்கெட் மைதானத்தில் ஜூலை 23ஆம் தேதி தொடங்கியது. இந்நிலையில், தொடரின் 5ஆவது லீக் போட்டியில் லைகா கோவை கிங்ஸ் அணியும், திண்டுக்கல் டிராகன்ஸ் அணியும் நேற்று (ஜூன் 26) மோதின. போட்டி திருநெல்வேலியில் நடைபெற்றது. டாஸ் வென்ற திண்டுக்கல் அணி பந்துவீச்சை தேர்வு செய்தது.
இதன்படி முதலில் களமிறங்கிய கோவை அணி 189 ரன்களை திண்டுக்கல் அணிக்கு இலக்காக நிர்ணயித்த நிலையில், 19.2 ஓவர்களிலேயே இலக்கை கடந்து திண்டுக்கல் அணி வெற்றிபெற்றது. பெரிய இலக்குடன் களமிறங்கிய திண்டுக்கல் அணிக்கு கேப்டன் ஹரி நிஷாந்த் - விஷால் வைத்யா ஜோடி அபாரமான தொடக்கத்தை அளித்தது.
இந்த ஜோடி 100 ரன்கள் பார்ட்னர்ஷிப் அமைத்த நிலையில், ஹரி நிஷாந்த் 7 பவுண்டரிகள், 2 சிக்ஸர் உள்பட 60 (36) ரன்களுக்கு ஆட்டமிழந்தார். மிடில் ஆர்டர் வீரர்கள் ஆர். விவேக், ஏஜி பிரதீப், கரப்பரம்பில் மோனிஷ் ஆகியோரும் வெற்றிக்கு பக்கப்பலமாக இருந்தனர். கோவை அணி பந்துவீச்சில் கேப்டன் ஷாருக் கான், ஆர். திவாகர் ஆகியோர் தலா 2 விக்கெட்டை கைப்பற்றினர்.