'தல' தோனியின் அடுத்த அவதாரம் - பெங்களூருவில் சர்வதேச பள்ளி தொடங்குகிறார்

கிரிக்கெட்டில் பல்வேறு சாதனைகளைப் படைத்த இந்திய கிரிக்கெட் அணியின் முன்னாள் கேப்டன் மகேந்திர சிங் தோனி , அடுத்த மாதம் பெங்களூருவில் சர்வதேச பள்ளி ஒன்றைத் தொடங்குகிறார்.

சர்வதேச கிரிக்கெட்டில் இருந்து ஓய்வு பெற்ற பிறகு, ஐபிஎல் போட்டிகளில் மட்டும் விளையாடி வரும் தோனி கிரிக்கெட் விளையாடாத தருணங்களில் விவசாயம் உள்ளிட்ட பல்வேறு தொழில்கள் செய்து வருகிறார். இந்த நிலையில் ஐபிஎல் முடிந்த கையோடு தோனி பெங்களூரு செல்ல இருப்பதாக கூறப்படுகிறது.

கர்நாடக மாநிலம், பெங்களூருவில் சர்வதேச தரத்தில் பள்ளி ஒன்றைக் கட்டியிருக்கிறார், தோனி. நவீன வசதிகளுடன் இப்பள்ளி கட்டமைக்கப்பட்டுள்ளது. மாணவர்களுக்கு கல்வி மட்டுமின்றி விளையாட்டு, திறன் மேம்பாடு தொடர்பான பயிற்சிகள் அளிக்கும் வசதிகளும் இப்பள்ளியில் இருப்பதாக கூறப்படுகிறது.

தோனி மற்றும் அவரது மனைவி சாக்‌ஷி ஆகியோர் இப்பள்ளியின் ஆலோசகர்களாக செயல்பட உள்ளனர். மாணவர்களின் நலனுக்காக மைக்ரோசாஃப்ட் நிறுவனத்துடன் இப்பள்ளி இணைந்திருக்கிறது. தோனி சர்வதேச பள்ளியில் நர்சரி முதல் 7ஆம் வகுப்பு வரையிலான மாணவர் சேர்க்கை நடைபெற்று வருகிறது. வரும் ஜூன் 1ஆம் தேதி பள்ளியில் வகுப்புகள் நடத்தப்பட உள்ளது.

இதையும் படிங்க: அறிமுக போட்டியிலேயே கவனம் ஈர்த்த குட்டி மலிங்கா! சி.எஸ்.கேவின் வருங்கால நட்சத்திரமா ? தோனி கணிப்பு