டெல்லி: ஐபிஎல் டி20 தொடரின் 14ஆவது சீசன் சாம்பியன் பட்டத்தை, சென்னை சூப்பர் கிங்ஸ் அணி வென்றது. 2010, 2011, 2018ஆம் ஆண்டுகளுக்குப் பிறகு, சென்னை அணி இந்தாண்டு நான்காவது முறையாக கோப்பையை வென்றுள்ளது.
அடுத்து 2022ஆம் ஆம் ஆண்டு நடைபெறவுள்ள ஐபிஎல் தொடரில், இரண்டு புதிய அணிகள் சேர்க்கப்படவுள்ளதாக பிசிசிஐ அறிவித்தது. இதனால், அடுத்தாண்டு மெகா ஏலம் நடைபெற இருக்கிறது.
தோனியை தக்கவைப்போம்
எனவே, ஒவ்வொரு அணியும் குறிப்பிட்ட வீரர்களை மட்டுமே தக்கவைத்துக்கொள்ள முடியும். மூன்று இந்திய வீரர்கள், ஒரு வெளிநாட்டு வீரர் அல்லது இரண்டு இந்தியர்கள், இரண்டு வெளிநாட்டினர் என்ற முறையில் தக்கவைத்துள்ளக் கொள்ளலாம் எனக் கூறப்படுகிறது.
இந்நிலையில், வரும் மெகா - ஏலத்தில் சென்னை அணி தக்கவைக்கும் முதல் வீரராக கேப்டன் தோனி இருப்பார் என சென்னை நிர்வாகி ஒருவர் தெரிவித்துள்ளதாகத் தகவல் வெளியாகியுள்ளது.