ஆஸ்திரேலியா அணிக்கு எதிரான டெஸ்ட் தொடருக்கு முன்பாக இந்திய அணி இரண்டு பயிற்சி போட்டிகளில் ஆடவுள்ளது. இதற்கான ஆஸ்திரேலிய அணியில், டெஸ்ட் அணியில் உள்ள ஒன்பது வீரர்கள் இடம்பெற்றுள்ளனர்.
வழக்கமாக ஆஸ்திரேலியாவுக்கு சுற்றுப்பயணம் செய்யும் அணிகளுக்கு இளைய அணியையும், வலுவிழந்த அணிகளையுமே பயிற்சி போட்டிகளில் ஆடுவதற்கு ஆஸி. தேர்வு செய்யும். 2018-19 தொடரில் ஆடிய பயிற்சி ஆட்டங்களில் 10 முதல்தர போட்டிகளில் கூட பங்கேற்றிடாத பல ஆஸ்திரேலிய இளம் வீரர்கள் தேர்வு செய்யப்பட்டனர். 2014-15ஆம் ஆண்டு தொடரில், டெஸ்ட் அணியில் இடம்பெற்ற ஒருவர் கூட பயிற்சி ஆட்டத்தில் ஆடவில்லை.
ஆனால் இம்முறை சூழல் வேறாக உள்ளது. கரோனா வைரஸ் (தீநுண்மி) காரணமாக பல நாள்களாக கிரிக்கெட்டை விளையாடாமல் இருப்பதால், பயிற்சி ஆட்டங்களில் ஆடுவதற்கு ஆஸ்திரேலிய டெஸ்ட் அணியில் இடம்பெற்ற வீரர்களும் தேர்வு செய்யப்பட்டுள்ளனர்.