ஆஸ்திரேலிய அணியின் அதிரடி ஆல் ரவுண்டர் கிளென் மேக்ஸ்வெல். இவர் சில மாதங்களுக்கு முன்பு மனஅழுத்தம் காரணமாக கிரிக்கெட்டிலிருந்து சில காலம் ஒதுங்கியிருந்தார். பின்னர் பிக் பாஷ் தொடரின்போது மீண்டும் கிரிக்கெட்டுக்குத் திரும்பிய மேக்ஸ்வெல், பல வகையில் அணிக்கு நம்பிக்கை அளித்துவருகிறார்.
இந்நிலையில் கிரிக்கெட்டிலிருந்து சில காலம் விலகியது பற்றி மேக்ஸ்வெல் மனம் திறந்துள்ளார். அதில், ''எனக்கும், ஷான் மார்ஷுக்கும் உலகக்கோப்பைத் தொடரின்போது காயம் ஏற்பட்டது. இருவரும் ஒன்றாகத்தான் மருத்துவமனை சென்றோம். அங்கே பரிசோதனை அறிக்கையில், எங்களுக்கு காயம் இருப்பது உறுதிசெய்யப்பட வேண்டும் என்று நினைத்தோம். கிரிக்கெட்டிலிருந்து எனக்கு சிலகாலம் ஓய்வு தேவைப்பட்டது.
எனக்கு அந்த நேரத்தில் யார் மீதும் கோபம் வரவில்லை. என் மீது மட்டுமே கோபம் வந்தது. உலகக்கோப்பைத் தொடரின்போது என்னால் சிறப்பாக ஆட முடியவில்லை. உலகக்கோப்பைத் தொடரிலிருந்து தப்பிப்பதற்கு காயம்தான் எளிதான வழி என்று நம்பினேன்.
அக்டோபர் மாதம் நடந்த இலங்கை அணிக்கு எதிரான தொடரில் 30 பந்துகளில் 60 ரன்கள் எடுத்தபோதும் எனக்கு மகிழ்ச்சியளிக்கவில்லை. 2-0 என்று அந்தத் தொடரில் முன்னிலைப் பெற்றபோதும், அணியிலிருந்து நான் விலக நினைத்தேன். இதைப்பற்றி எங்கள் பயிற்சியாளர் ஜஸ்டின் லாங்கரிடம் பேசினேன்.
எனது நிலைப் பற்றி அணியிடம் கூறினால், அவர்களையும் அது பாதிக்கும். அதனால் ஃபின்சிடம்கூட என்னால் கூற முடியவில்லை.