ஆஸ்திரேலியாவுக்குச் சுற்றுப்பயணம் மேற்கொண்டுள்ள இந்திய அணி தற்போது பார்டர் கவாஸ்கர் டெஸ்ட் தொடரில் விளையாடி வருகிறது. இத்தொடரின் 3-ஆவது டெஸ்ட் சிட்னியில் நடைபெற்று வருகிறது. இதில் டாஸ் வென்ற ஆஸி. கேப்டன் டிம் பெய்ன், பேட்டிங்கைத் தேர்வு செய்தார்.
ஆஸ்திரேலிய அணி முதல் இன்னிங்ஸில் 338 ரன்கள் எடுத்தது. இதில் சிறப்பாக விளையாடிய ஸ்மித் 131 ரன்கள் எடுத்தார். இந்திய அணி தரப்பில் ஜடேஜா 4 விக்கெட்டுகளை வீழ்த்தினார். 2ஆம் நாள் முடிவில் இந்திய அணி தனது முதல் இன்னிங்ஸில் 2 விக்கெட் இழப்புக்கு 96 ரன்கள் எடுத்தது.
இன்று தொடங்கிய மூன்றாம் நாள் ஆட்டத்தில் அடுத்தடுத்து விக்கெட்டுகளை இழந்த இந்திய அணி தேநீர் இடைவேளைக்கு முன்னதாகவே அனைத்து விக்கெட்டுகளையும் இழந்து 244 ரன்களை எடுத்தது. இதில் சுப்மன் கில், புஜாரா தலா 50 ரன்களை எடுத்தனர். ஆஸ்திரேலிய தரப்பில் பாட் கம்மின்ஸ் 4 விக்கெட்டுகளைக் கைப்பற்றினார். இதனால் முதல் இன்னிங்ஸில் ஆஸ்திரேலிய அணி 94 ரன்கள் முன்னிலை பெற்றுள்ளது.