மும்பை அணி அபார வெற்றி...!

மும்பை: மும்பை வான்கடே மைதானத்தில் நடைபெற்ற ஐபிஎல் கிரிக்கெட் தொடரின் 31ஆவது ஆட்டத்தில் பெங்களூருவை வீழ்த்தி மும்பை அணி அபார வெற்றிபெற்றது.

மும்பை வான்கடே மைதானத்தில் இன்று நடைபெற்ற 31ஆவது ஆட்டத்தில் மும்பை இந்தியன்ஸ், ராயல் சேலஞ்சர்ஸ் அணிகள் மோதின. முதல் இன்னிங்ஸில் டி வில்லியர்ஸ்-மோயின் அலியின் அதிரடி ஆட்டத்தால் 171 ரன்களை எடுத்தது ராயல் சேலஞ்சர்ஸ்.

172 ரன்கள் எடுத்தால் வெற்றி என களமிறங்கிய மும்பை அணி வீரர்கள் அதிரடியான ஆட்டத்தை வெளிப்படுத்தினர். தொடக்க வீரர்களான டி காக், ரோகித் ஷர்மா பெங்களூரு அணி பந்து வீச்சாளர்களை திணறவைத்தனர்.

டி காக் 26 பந்துகளில் 40 ரன்களும், ரோகித் சர்மா 19 பந்துகளில் 28 ரன்கள் எடுத்து ஆட்டமிழந்தனர். பிறகு, அதிரடி ஆட்டத்தை வெளிப்படுத்திய ஹர்திக் பாண்டியா 16 பந்துகளில் 37 ரன்கள் எடுத்து கடைசிவரை ஆட்டமிழக்காமல் மும்பை அணியை வெற்றிக்கு அழைத்துச் சென்றார்.

பெங்களூரு அணிக்காக மோயின் அலி சிறப்பாக பந்து வீசி 18 ரன்களை விட்டுகொடுத்து இரண்டு விக்கெட்டுகளை கைப்பற்றினார்.