முதல் போட்டியிலேயே காயமடைந்த வேகப்பந்துவீச்சாளர் - தொடரிலிருந்து வெளியேற்றம்!

நியூசிலாந்து அணியின் வேகப்பந்து வீச்சாளர் லோக்கி ஃபெர்குசன் தனது முதல் டெஸ்ட் போட்டியில் ஏற்பட்ட காயம் காரணமாக, ஆஸ்திரேலிய அணியுடனான இரண்டாவது போட்டியிலிருந்து விலகியுள்ளார்.

ஆஸ்திரேலியாவில் சுற்றுப்பயணம் மேற்கொண்டுள்ள நியூசிலாந்து அணி மூன்று போட்டிகள் கொண்ட டெஸ்ட் தொடரில் விளையாடி வருகிறது. இவ்விரு அணிகளுக்கிடையிலான முதலாவது டெஸ்ட் போட்டியானது பகலிரவு போட்டியாக பெர்த்தில் நடைபெற்றது.

இந்த ஆட்டத்தில் நியூசிலாந்து அணியின் நட்சத்திர வேகப்பந்துவீச்சாளர் ட்ரண்ட் போல்ட் விலகிய காரணத்தினால், அவருக்கு பதிலாக லோக்கி ஃபர்குசன் அணியில் இடம்பெற்றார். தனது முதல் சர்வதேச டெஸ்ட் போட்டியில் இடம்பெற்றிருந்த ஃபர்குசன், 11 ஓவர்களை மட்டும் வீசியிருந்த நிலையில் வலது கையில் ஏற்பட்ட காயம் காரணமாக, ஆட்டத்தின் பாதியிலேயே வெளியேறினார்.

அதன்பிறகு மருத்துவமனையில் அனுமதிக்கப்பட்ட அவருக்கு ஸ்கேன் எடுக்கப்பட்டது. அதில் அவருக்கு இரண்டாம் நிலை காயம் இருப்பது உறுதியானது. இதனால் அவர் தனது முதல் சர்வதேச போட்டியோடு, டெஸ்ட் தொடரிலிருந்து விலகியுள்ளார்.

மேலும் இதுகுறித்து நியூசிலாந்து கிரிக்கெட் வாரியம் தனது ட்விட்டர் பக்கத்தில், லோக்கி ஃபர்குசன் தனது காயம் காரணமாக ஆறு வார காலத்திற்கு ஓய்வெடுக்க வேண்டியுள்ளதால், அவர் ஆஸ்திரேலியா அணியுடனான டெஸ்ட் தொடரிலிருந்து முற்றிலுமாக விலகியுள்ளார். மேலும் அவருக்கு பதிலாக மாற்று வீரர் இன்னும் 24 மணி நேரத்திற்குள் அறிவிக்கப்படுவார் என பதிவிடப்பட்டுள்ளது.

ஏற்கனவே நியூசிலாந்து அணி, ஆஸ்திரேலிய அணியுடனான முதலாவது டெஸ்ட் போட்டியில் 296 ரன்கள் வித்தியாசத்தில் படுதோல்வியடைந்தது. இந்நிலையில் அந்த அணியின் வேகப்பந்துவீச்சாளர் காயம் காரணமாக விலகியுள்ளது, அந்த அணிக்கு மேலும் பின்னடைவை ஏற்படுத்தும் என்பதில் ஐயமில்லை.

இதையும் படிங்க: பகலிரவு டெஸ்ட்: ஸ்டார்க் பந்துவீச்சில் சரிந்த நியூசிலாந்து - ஆஸ்திரேலியா அபார வெற்றி!