தாய்லாந்து ஓபன்: அரையிறுதியில் அஸ்வினி, ரங்கிரெட்டி இணை!

தாய்லாந்து ஓபன் பேட்மிண்டன் தொடரின் கலப்பு இரட்டையர் பிரிவில் இந்தியாவின் அஸ்வினி பொன்னப்பா, சாத்விக் சாய்ராஜ் ரங்கிரெட்டி இணை அரையிறுதி சுற்றுக்கு முன்னேறியுள்ளது.

பாங்காக்கில் நடைபெற்றுவரும் தாய்லாந்து ஓபன் பேட்மிண்டன் தொடர் தற்போது இறுதிக்கட்டத்தை எட்டியுள்ளது. இதில் இன்று (ஜன.22) நடைபெற்ற கலப்பு இரட்டையர் பிரிவின் காலிறுதி சுற்று ஆட்டத்தில் இந்தியாவின் அஸ்வினி பொன்னப்பா, சாத்விக் சாய்ராஜ் ரங்கிரெட்டி இணை - மலேசியாவின் பெங் சூன் சான், லி யிங் கோச் இணையை எதிர்கொண்டது.

இப்போட்டியின் முதல் செட்டை பெங் சூன் இணை 21-18 என்ற கணக்கில் கைப்பற்றி அஸ்வினி பொன்னப்பா இணைக்கு அதிர்ச்சியளித்தது. இதையடுத்து இரண்டாவது செட்டில் அதிரடியான ஆட்டத்தை வெளிப்படுத்திய அஸ்வினி இணை 24-22 என்ற கணக்கில் செட்டை கைப்பற்றி தோல்வியை தவிர்த்தது.

தொடர்ந்து மூன்றாவது செட் ஆட்டத்திலும் அபார ஆட்டத்தை வெளிப்படுத்திய இந்திய அணி 22-20 என்ற கணக்கில் மூன்றாவது செட்டையும் போராடி வெற்றி பெற்றது.

இதன் மூலம் இந்தியாவின் அஸ்வினி, ரங்கிரெட்டி இணை 18-21, 24-22, 22-20 என்ற செட் கணக்கில் மலேசியாவின் பெங் சூன் சான், லி யிங் கோச் இணையை வீழ்த்தி தாய்லாந்து ஓபன் பேட்மிண்டன் தொடரின் கலப்பு இரட்டையர் அரையிறுதி சுற்றுக்கு முன்னேறியது.

இதையும் படிங்க:‘பாகிஸ்தானில் பாதுகாப்பாக உணர்கிறோம்’ - பாப் டூ பிளஸிஸ்