முறுக்கு மீசையுடன் 'சங்கத்தமிழன்' விஜய் சேதுபதி

முரட்டு மீசையுடன் விஜய் சேதுபதி நடித்துள்ள "சங்கத்தமிழன்" படத்தின் ஃபர்ஸ்ட் லுக் போஸ்டர் வெளியாகியுள்ளது.

காலத்தால் அழியாத காவியங்களான பாதாள பைரவி, மாயாபஜார், மிஸ்ஸியம்மா, எம்.ஜி.ஆர் நடித்த எங்க வீட்டு பிள்ளை, நம்நாடு, ரஜினிகாந்த் நடித்த உழைப்பாளி, கமல்ஹாசன் நடித்த நம்மவர் மற்றும் தாமிரபரணி, படிக்காதவன், வேங்கை, வீரம், தளபதி உள்ளிட்ட சுமார் 60க்கும் மேற்பட்ட வெற்றிப்படங்களை விஜயா புரொடக்ஷன்ஸ் தயாரித்துள்ளது. இயக்குநர் விஜய் சந்தர் இயக்கத்தில் விஜய் சேதுபதி நடிக்கும் "சங்கத்தமிழன் படத்தை பிரமாண்ட பொருட்செலவில் இந்நிறுவனம் தயாரித்து வருகிறது.

இப்படத்தில் விஜய் சேதுபதி, நடிகை ராஷிகண்ணா, நிவேதா பெத்துராஜ் நாசர் , சூரி , அசுதோஷ் ராணா ஆகியோர் நடித்துள்ளனர். விவேக்-மெர்வின் ஆகிய இரட்டையர் இசையமைத்துள்ள இந்த படத்திற்கு வேல்ராஜ் ஒளிப்பதிவு செய்துள்ளார். இப்படத்தின் படப்பிடிப்பு சென்னையை சுற்றியுள்ள பகுதிகளில் விறுவிறுப்பாக நடைபெற்று வருகிறது. முன்னதாக இப்படத்தின் டைட்டில் மற்றும் ஃபர்ஸ்ட் லுக் போஸ்டர் இன்று வெளியாகும் என படக்குழுவினர் அறிவித்திருந்தனர். அதன்படி முறுக்கு மீசையுடன் வீறுக்கொண்டு சண்டை போடுவது போல் படத்தின் போஸ்டர் வெளியாகியுள்ளது. படத்திற்கு 'சங்கத்தமிழன்' என பெயரிட்டு படக்குழுவினர் ஒட்டுமொத்த ரசிகர்களுக்கும் மொரட்டு விருந்து அளித்தனர்.

மேலும், இதனைப் பார்த்த ரசிகர்கள் படத்தின் டீசரைக் காண பெரும் எதிர்பார்ப்புடன் காத்திருக்கின்றனர்.