அடுத்த படம் கொக்கி குமாருடன் தான் - 'புதுப்பேட்டை 2' அப்பேட்டை வெளியிட்ட செல்வராகவன்

என்னுடைய அடுத்த படம் தனுஷூடன் தான் என இயக்குநர் செல்வராகவன் புதுப்பேட்டை 2 பட அப்டேட் குறித்து கல்லூரி நிகழ்ச்சி ஒன்றில் கூறியுள்ளார்.

தமிழ் சினிமாவில் வெளியான கேங்ஸ்டர் திரைப்படங்களில் ‘புதுப்பேட்டை’ படத்துக்கு எப்போதும் தனி இடம் உண்டு. புதுப்பேட்டை படத்துக்கு முன், புதுப்பேட்டை படத்துக்கு பின் என கேங்ஸ்டர் திரைப்படங்களை வரையறுக்கலாம் என சில சினிமா விமர்சகர்கள் சொல்வதுண்டு.

செல்வராகவன் இயக்கத்தில் தனுஷ், சிநேகா, சோனியா அகர்வால் ஆகியோர் முன்னணி கதாபாத்திரங்களை ஏற்று நடித்திருந்த இத்திரைப்படம், 2006ஆம் ஆண்டு மே 26 அன்று வெளியானது. ‘புதுப்பேட்டை’ வெளியான சமயம் சரியான அங்கீகாரத்தைப் பெறவில்லை.

இதற்கு முந்தைய செல்வராகவன் படம்போல் இத்திரைப்படம் இல்லை, கேங்ஸ்டர் படக்கதையை ஜவ்வாக இழுத்திருக்கிறார் என எக்கச்சக்க விமர்சனங்கள் எழுந்தன. எனினும் படம் வணிக ரீதியாக தோல்வியை சந்திக்கவில்லை. சில ஆண்டுகள் கழித்து இந்தப் படத்தை பார்த்தவர்கள் இதனை பெரிதும் கொண்டாடத் தொடங்கினார்கள்.

அதன்பிறகு மீண்டும் இந்தப் படத்தை பார்த்துவிட்டு பெரிய அளவில் விமர்சனம் எழுதிய சினிமா விமர்சகர்களும் உள்ளார்கள். தனுஷ் திரையுலக பயணத்தில் இது மாபெரும் திருப்புமுனையாக அமைந்த படம். செல்வராகவன் இயக்கத்தில் கடைசியாக என்ஜிகே கடந்தாண்டு வெளியாகி கலவையான விமர்சனங்களை பெற்றத்திருந்தது.

தமிழ் சினிமா ரசிகர்களின் இதுவரை நிறைவேறாத ஆசையென்றால் அது செல்வராகவனின் 'ஆயிரத்தில் ஒருவன்' திரைப்படத்தின் இரண்டாம் பாகம்தான். அதையடுத்து 'புதுப்பேட்டை' திரைப்படத்தின் இரண்டாம் பாகமும் ரசிகர்களின் நிறைவேறாத ஆசையாகவே இருந்துவருகிறது.

இதனையடுத்து சமீபத்தில் தனியார் பொறியில் கல்லூரி நிகழ்ச்சியில் கலந்துக்கொண்ட செல்வராகவன் பேசுகையில், என்ஜிகே பின் நிறைய பேர் என்னிடம் அடுத்து என்ன படம் பண்ண போகிறீர்கள் என கேட்டுக்கொண்டிருக்கிறார்கள். இப்போது சொல்கிறேன், என்னுடைய அடுத்த படம் தனுஷூடன் இருக்கும். 'புதுப்பேட்டை 2' படத்தை எடுக்க உள்ளேன் என்றார்.

தனுஷ் - செல்வராகவன் கூட்டணியில் கடைசியாக வெளியானப்படம் 'மயக்கம் என்ன'. தனுஷ் தற்போது பிஸியான ஷெடுலில் அடுத்தடுத்து படங்களில் நடித்து வரும் வேளையில் 'புதுப்பேட்டை 2' படத்துக்கான கால்ஷீட் எப்போது கொடுப்பார் என ரசிகர்கள் தற்போது பெரும் எதிர்பார்ப்பில் இருந்து வருகின்றனர்.

இதையும் படிங்க: ஆறு வயதில் நிகழ்ந்த அக்கிரமம் - 'பிக் பாஸ்' பிரபலத்தின் ஷாக் ப்ளாஷ்பேக்