பிரமாண்ட பட்ஜெட் படத்தில் நடிக்கும் பிரபாஸ்!

நடிகர் பிரபாஸ் 'ஆதிபுருஷ்' என்ற புதிய பிரமாண்ட படத்தில் நடிக்க ஒப்பந்தம் செய்யப்பட்டுள்ளதாக அறிவிப்பு வெளியாகியுள்ளது.

இயக்குநர் ஓம் ராவுத் இயக்கத்தில் இந்த ஆண்டு தொடக்கத்தில் வெளியான திரைப்படம் 'தன்ஹாஜி' (Tanhaji). அஜய் தேவ்கன் கதாநாயகனாக நடித்திருந்த இத்திரைப்படம் வசூல் ரீதியாக மாபெரும் வரவேற்பை பெற்றது.

அதைத்தொடர்ந்து தற்போது இயக்குநர் ஓம் ராவுத், 'ஆதிபுருஷ்' என்ற படத்தை இயக்கவுள்ளார். பிரமாண்ட பொருட்செலவில் தயாராகும் இத்திரைப்படத்தை டீ-சீரிஸ் நிறுவனம் தயாரிக்கிறது. தமிழ், தெலுங்கு, இந்தி, மலையாளம் ஆகிய மொழிகளில் தயாராகும் இத்திரைப்படத்தில் கதாநாயகனாக நடிகர் பிரபாஸ் நடிக்க ஒப்பந்தமாகியுள்ளார்.

3-டியில் தயாராகும் இத்திரைப்படத்தின் படப்பிடிப்பு 2021ஆம் ஆண்டு தொடங்கும் எனவும், 2022ஆம் ஆண்டு படம் வெளியாகும் என்றும் தெரிவிக்கப்பட்டுள்ளது. 'ஆதிபுருஷ்' படத்தின் ஃபர்ஸ்ட் லுக் போஸ்டர் தற்போது சமூக வலைதளங்களில் வைரலாகிறது.