ஹைதராபாத் : செல்லமே படத்தில் விடலை பையனாக பரத் செய்த வில்லத்தனம் இன்றளவும் உயிரோட்டம்.
தமிழ் ரசிகர்களால் சின்ன தளபதி என அழைக்கப்படும் பரத் 1983ஆம் ஆண்டு ஜூலை 21ஆம் தேதி பிறந்தார். தமிழ், மலையாளம், தெலுங்கு எனப் பிஸியாக நடித்துவரும் பரத் தீவிர கால்பந்து ரசிகர். இவர் சின்ன வயதிலேயே கைதேர்ந்த டான்ஸராக விளங்கினார். 11 வயதிலேயே சர்வதேச டான்ஸ் போட்டிகளில் கலந்துள்ளார்.
இவர் ஷங்கரின் பாய்ஸ் படத்தில் 2003ஆம் ஆண்டு தமிழில் அறிமுகமானார். இந்தப் படம் பரத்துக்கு நல்ல பெயரை பெற்றுக்கொடுத்தது. தொடர்ந்து ஜெயராஜ் இயக்கத்தில் 2004இல் போர்த் பீப்பிள் (4 the People) என்ற மலையாள படத்தில் அறிமுகமானார்.
இவரின் கேரியலில் காதல் மாபெரும் வெற்றி படமாக அமைந்தது. பட்டிதொட்டியெங்கும் பரத்துக்கு ரசிகர் பட்டாளத்தை உருவாக்கியது. படத்தின் காதல் காட்சிகள் பெரிதும் பேசப்பட்டன. தொடர்ந்து பட்டியல், எம் மகன், வெயில், பழனி, கண்டேன் காதலை, வானம், ஐந்து ஐந்து ஐந்து, காளிதாஸ் உள்ளிட்ட படங்களில் நடித்தார்.
விஷாலின் செல்லமே படத்தில் விடலை பையனாக வில்லத்தனத்தில் மிரட்டியிருப்பார். இது அவருக்கு பலதரப்பட்ட ரசிகர்களை பெற்றுகொடுத்தது.