மலையாளத்தில் கடந்த 2013 ஆம் ஆண்டு டிசம்பர் 19 ஆம் தேதி, ஜீத்து ஜோசப் இயக்கத்தில் மோகன்லால் நடிப்பில் வெளியான படம் த்ரிஷயம். மோகன்லாலுடன் மீனா உள்ளிட்டோர் நடித்திருந்தார். அப்போது இப்படம் மாபெரும் வெற்றி பெற்றது. இந்த வெற்றியைத் தொடர்ந்து இதே கூட்டணி 'த்ரிஷ்யம் 2' படத்திலும் இணைந்தது.
கரோனா அச்சம் காரணமாக, திரையரங்கு வெளியீட்டை தவிர்த்து ஓடிடி தளமான அமேசான் ப்ரைமில் த்ரிஷ்யம் 2 பிப்ரவரி 19ஆம்தேதி வெளியானது. மலையாளத்தில் மெகா ஸ்டார் நடிகரின் படம் நேரடியாக டிஜிட்டல் தளமான ஓடிடியில் வெளியானது என்ற பெருமையை த்ரிஷ்யம் 2 பெற்றது. முதல் பாகம் பெரும் வெற்றி பெற்றதை அடுத்து, அதன் 2 பாகம் மீது ரசிகர்கள் பெரும் எதிர்பார்ப்பில் இருந்தனர்.
முதல் பாகத்தின் முடிவிலிருந்து இரண்டாம் பாகத்தை இயக்குநர் தொடங்கினார். இதனால் த்ரியஷம் 2 படம் சமூகவலைதளத்தில் விமர்சன ரீதியாக மாபெரும் வரவேற்பைப் பெற்று வருகிறது. சமூகவலைதளத்தில் பிரபலங்கள், ரசிகர்கள் என பலரும் படத்தின் கதை, திரைக்கதை குறித்து சிலிர்ப்புடன் பகிர்ந்து வருகின்றனர்.
இந்தநிலையில், முதல் பாகம் தமிழ், தெலுங்கு, இந்தியில் ரீமேக் செய்தைப் போன்று, இரண்டாம் பாகம் தற்போது தெலுங்கில் ரீமேக் செய்யப்படவுள்ளது. இதில் முதல் பாகத்தில் நடித்த வெங்கடேஷ் இரண்டாம் பாகத்தில் நடிக்கிறார். இதையும் ஜீத்து ஜோசப்பே ரீமேக் செய்கிறார். மார்ச் மாதம் இப்படத்தின் படப்பிடிப்பு பணிகள் தொடங்கவுள்ளன.
இதையும் படிங்க: த்ரிஷ்யம் 2 ரகசியம் வெளிப்படுமா? டீஸருக்குள் ஒளிந்திருக்கும் சர்ப்ரைஸ்!
