'பீஸ்ட்' மோட் ஆன்: தளபதியுடன் கைக்கோர்த்த செல்வராகவன்!

விஜய் நடிப்பில் உருவாகி வரும் 'பீஸ்ட்' படத்தில் முக்கிய கதாபாத்திரத்தில் இயக்குநர் செல்வராகவன் நடிக்க ஒப்பந்தம் செய்யப்பட்டுள்ளார்.

'டாக்டர்' படத்தை இயக்கிய நெல்சன், அடுத்தாக நடிகர் விஜய்யை வைத்து 'பீஸ்ட்' என்னும் புதிய படத்தை இயக்குகிறார். சன் பிக்சர்ஸ் தயாரிக்கும் இப்படத்திற்கு அனிருத் இசையமைக்கிறார். மனோஜ் பரமஹம்சா ஒளிப்பதிவு செய்கிறார்.

இந்தப் படத்தில் விஜய்க்கு ஜோடியாக பூஜா ஹெக்டே நடிக்கிறார். தற்போது இப்படத்தில் முக்கிய கதாபாத்திரத்தில் இயக்குநர் செல்வராகவன் நடிக்க ஒப்பந்தம் செய்யப்பட்டுள்ளார். இதில் வில்லன் கதாபாத்திரல் செல்வராகவன் நடிக்கவுள்ளதாக தகவல்கள் தெரிவிக்கின்றனர். செல்வராகவன் 'பீஸ்ட்' மட்டுமல்லாது 'சாணிக் காயிதம்' படத்திலும் நடித்துவருகிறார்.

பீஸ்ட் படத்தின் முதல்கட்ட படப்பிடிப்பு ஜார்ஜியாவில் நடைபெற்ற நிலையில், இரண்டாம் கட்ட படப்பிடிப்பு சென்னையில் ஜூலை மாதம் 1ஆம் தேதி தொடங்கியது. அதில் விஜய், பூஜா ஹெக்டே ஆகியோரின் காட்சிகள் படமாக்கப்பட்டன.

இந்நிலையில், தற்போது இப்படத்தின் மூன்றாம்கட்ட படப்பிடிப்பு மீண்டும் சென்னை கிழக்கு கடற்கரைச் சாலையில் உள்ள ரிசார்ட்டில் தொடங்கியுள்ளது.

அதில், படத்தின் முக்கியக் காட்சிகள் படமாக்கப்படுவதாகக் கூறப்படுகிறது. பிறகு ரஷ்யா செல்ல படக்குழுத் திட்டமிடப்பட்டிருப்பதாகவும் கூறப்படுகிறது.