மாரி செல்வராஜ் இயக்கத்தில் தனுஷ், ரஜிஷா விஜயன் ஆகியோர் முன்னணி கதாபாத்திரங்களில் நடித்துள்ள படம் ‘கர்ணன்’. ‘பரியேறும் பெருமாள்’ படத்துக்குப் பிறகு மாரி இயக்கியுள்ள படம் என்பதால் இதற்கு தமிழ் சினிமா ரசிகர்கள் மத்தியில் பெரும் எதிர்பார்ப்பு உள்ளது.
கலைப்புலி தாணு தயாரிப்பில் உருவாகியுள்ள இப்படத்துக்கு கண்களாகச் செயல்பட்டிருக்கிறார் தேனி ஈஸ்வரன். இசையின் வழியில் படத்தை அடுத்த தளத்திற்கு எடுத்துச் சென்றிருக்கிறார் சந்தோஷ் நாராயணன். ஏப்ரல் 9ஆம் தேதி வெளியாகும் இந்தப் படத்தின் இசை வெளியீட்டு விழா இன்று (மார்ச் 31) சென்னையில் நடைபெற்றது.
இதில், தயாரிப்பாளர் கலைப்புலி தாணு, இயக்குநர் மாரி செல்வராஜ், நடராஜ், ஒளிப்பதிவாளர் தேனி ஈஸ்வர், யோகிபாபு, இசை அமைப்பாளர் சந்தோஷ் நாராயணன், பாடலாசிரியர் யுகபாரதி, கலை இயக்குநர் (ஆர்ட் டைரக்டர்) ராமலிங்கம், எடிட்டர் செல்வம், நடன இயக்குநர் சாண்டி, பாடகி தீ, நடிகை ரஜிஷா விஜயன் உள்ளிட்ட படக்குழுவினர் கலந்துகொண்டனர்.
ஏற்கெனவே கர்ணன் படத்திலிருந்து வெளியான கண்டா வரச்சொல்லுங்க, பண்டாரத்தி புராணம், தட்டான் தட்டான் ஆகிய பாடல்கள் பெரும் வரவேற்பைப் பெற்றிருந்த நிலையில், 4ஆவது பாடல் இன்று வெளியானது. மாரி செல்வராஜ் எழுதிய ’உட்ராதீங்க யப்போவ்’ பாடலை தீ பாடியுள்ளார்.
