'தர்பார்' படத்திற்குப் பிறகு சூப்பர் ஸ்டார் ரஜினிகாந்த் நடிப்பில் உருவாகியுள்ள திரைப்படம் 'அண்ணாத்த'. சிறுத்தை சிவா இயக்கிய இப்படத்தை சன் பிக்சர்ஸ் நிறுவனம் தயாரிக்கிறது.
'அண்ணாத்த' படத்தில் ரஜினிக்கு ஜோடியாக நயன்தாரா நடிக்க, முறைப் பெண்ணாக குஷ்பூ நடித்துள்ளார். அதேபோல் சகோதரியாகக் கீர்த்தி சுரேஷ் நடித்துள்ளார். மேலும் சூரி, பிரகாஷ் ராஜ், ஜகபதி பாபு, சதீஷ் உள்ளிட்டோர் முன்னணி கதாபாத்திரங்களில் நடித்துள்ளனர்.
'அண்ணாத்த' படத்தின் படப்பிடிப்பு ஹைதராபாத், சென்னை, லக்னோ, கொல்கத்தா ஆகிய பகுதிகளில் நடந்துமுடிந்த நிலையில், போஸ்ட் புரொடக்ஷன் பணிகள் விறுவிறுப்பாக நடைபெற்றுவருகின்றன.
இந்நிலையில் 'அண்ணாத்த' படத்தின் அப்டேட் இன்று (செப். 10) விநாயகர் சதுர்த்தி ஸ்பெஷலாக வெளியாகியுள்ளது. அதன்படி படக்குழு 'அண்ணாத்த' ஃபர்ஸ்ட் லுக் போஸ்டரை வெளியிட்டுள்ளது.
அதில், வெள்ளை வேட்டி சட்டையில் மிகவும் மாஸாக திருவிழாவில் நடனமாடுவது போன்று ரஜினி இடம்பெற்றுள்ளார். இதுதவிர படத்தின் மோஷன் போஸ்டர் மாலை 6 மணிக்கு வெளியாகும் எனப் படக்குழு அறிவித்துள்ளது. நவம்பர் மாதம் 4ஆம் தேதி இப்படம் திரையரங்குகளில் வெளியாகும் என ஏற்கனவே படத்தின் தயாரிப்பு நிறுவனம் அறிவித்துள்ளது.