சென்னை: மோகன்லால், பிரபு, அர்ஜூன், சுனில் ஷெட்டி எனப் பலர் நடித்து உருவாகியிருக்கும் 'மரைக்காயர்' படத்தின் தமிழ் ட்ரெய்லரை நடிகர் சூர்யா வெளியிட்டார்.
வரலாற்றுப் படமாக உருவாகியிருக்கும் 'மரைக்காயர்' தமிழ்ப் பதிப்பு ட்ரெய்லரை நடிகர் சூர்யா தனது ட்விட்டரில் வெளியிட்டார். இதையடுத்து 'மரைக்காயர்' படத்தின் ட்ரெய்லரை வெளியிடுவதில் மகிழ்ச்சி. இந்தப் படத்தை எதிர்நோக்கி காத்திருப்பதாகக் குறிப்பிட்டுள்ளார்.
கேரளாவிலுள்ள கோழிக்கோட்டில் 17ஆம் நூற்றாண்டில் போர்த்துக்கீசியர்களுக்கு எதிராக குரல் எழுப்பிய 'குஞ்சாலி மரைக்காயர்' என்ற இஸ்லாமிய மன்னனின் வரலாற்றைக் கூறும் கதையாக இந்தப் படம் உருவாகியுள்ளது.
மலையாளத் திரையுலகின் வெற்றிக்கூட்டணியாக கருதப்படும் இயக்குநர் ப்ரியதர்ஷன் - நடிகர் மோகன்லால் ஆகியோர் நீண்ட இடைவெளிக்குப் பிறகு இந்தப் படத்தில் கூட்டணி அமைத்துள்ளனர். படத்தில் மோகன்லாலுடன், நடிகர்கள் பிரபு, அர்ஜூன், இந்தி நடிகர் சுனில் ஷெட்டி, பிரனவ் மோகன்லால், கீர்த்தி சுரேஷ், கல்யாணி ப்ரியதர்ஷன், மஞ்சு வாரியர், சுஹாசினி, அசோக் செல்வன், இன்னோசன்ட் எனப் பெரும் நட்சத்திரப் பட்டாளமே நடித்துள்ளனர்.
'யார் இந்த குஞ்சாலி' என்ற எதிர்பார்ப்பை ஏற்படுத்தி 'யுத்தத்தில் நாம் ஜெயிக்கிறோம்' என்று குஞ்சாலியாக தோன்றும் மோகன்லால் கூறும் காட்சி, அனல் பறக்கும் சாகசங்கள் எனப் படத்தின் ட்ரெய்லர் காட்சிகளில் அமைந்துள்ளன.