மார்த்தாண்டத்தில் தொடர் கொள்ளை; அச்சத்தில் கிராம மக்கள்!

கன்னியாகுமரி: மார்த்தாண்டம் பகுதியில் தொடர்ந்து நடைபெற்று வரும் கொள்ளை சம்பவங்களால், கடை உரிமையாளர்கள் மற்றும் பொதுமக்களிடைய அச்சத்தை ஏற்படுத்தியுள்ளது.

கன்னியாகுமரி மாவட்டம், மார்த்தாண்டம் அருகே பம்மம் பகுதியை சேர்ந்தவர் கிருஷ்ணன். இவர் கடந்த ஐந்து நாட்களுக்கு முன்பு வெளியூர் சென்றிருந்தபோது வீட்டின் பூட்டை உடைத்து 44 சவரன் தங்க நகைகள் கொள்ளையடிக்கப்பட்டது. இது குறித்து காவல்துறையினர் விசாரணை நடத்திவரும் நிலையில் இன்று அதிகாலை பயணம் எனும் பகுதியில் என்ஆர்எஸ்ஏ என்ற பெயரில் செயல்பட்டு வரும் பலசரக்குக் கடையின் பூட்டை உடைத்து ரூ.20 ஆயிரத்தை அடையாளம் தெரியாத நபர்கள் கொள்ளையடித்து சென்றுள்ளனர்.

இது குறித்து கடை உரிமையாளர் நேசையன், மார்த்தாண்டம் காவல்துறையினருக்கு தகவல் கொடுத்தார். சம்பவ இடத்திற்கு விரைந்து வந்து காவலர்கள், கண்காணிப்பு கேமரா பதிவுகளை சோதனை செய்தனர். அப்போது, தலையில் துண்டு அணிந்து கையில் கம்பியுடன் வரும் ஒரு நபர் கண்காணிப்பு கேமராக்களின் திசையை அவர் வைத்திருந்த கம்பியால் மாற்றி விட்டு முகத்தை மூடி உள்ளே சென்று கல்லாவில் இருக்கும் ரூ.20 ஆயிரத்தை கொள்ளையடித்து விட்டு அங்கிருந்து தப்பித்து செல்லும் காட்சிகள் பதிவாகி இருந்தது.

இதைத் தொடர்ந்து அந்தக் காட்சிகளின் அடிப்படையில் வழக்குப்பதிவு செய்து கொள்ளையர்களை காவல்துறையினர் தேடி வருகின்றனர். அடுத்தடுத்து அரங்கேறும் கொள்ளை சம்பவங்களால் அப்பகுதி மக்கள் அச்சத்தில் ஆழ்ந்துள்ளனர்.