வீட்டின் பின்புறமாக நுழைந்து நகை, பணம் கொள்ளை

பெரம்பலூர்: பெரம்பலூர் அருகே 15 பவுன் நகை, 1 லட்சம் பணம், பட்டுப்புடவைகள் என ரூ. 8 லட்சம் மதிப்பிலான பொருள்கள் கொள்ளையடிக்கப்பட்டுள்ளன.

பெரம்பலூர் அருகே திருச்சி-சென்னை தேசிய நெடுஞ்சாலையில் உள்ள செங்குணம் பிரிவு ரோடு பகுதியில், குடியிருந்துவருபவர் ரஹ்மான்யா. இவரது கணவர் முபாரக் பாஷா வெளியூரில் வேலை பார்க்கும் நிலையில், ரஹ்மான்யா தனது தாயார் மற்றும் பிள்ளைகளுடன் வீட்டில் நேற்று இரவு (அக்.29) தூங்கிக்கொண்டு இருந்துள்ளார்.

அப்போது அடையாளம் தெரியாத நபர்கள் ரஹ்மான்யா வீட்டின் பின்புறம் ‌உள்ள காம்பவுண்ட் வழியாக குதித்து, வீட்டிலிருந்த பீரோவை உடைத்து 15 பவுன் நகைகள், ஒரு லட்சம் ரொக்கம், 50 வெளிநாட்டு புடவைகள் ஆகியவற்றை கொள்ளையடித்து சென்றுள்ளனர்.

இன்று (அக். 30) காலை எழுந்து பார்த்தபோது தனது வீட்டில் கொள்ளை சம்பவம் நிகழ்ந்திருப்பது தெரியவந்துள்ளது.

பின்னர் இது தொடர்பாக பெரம்பலூர் காவல் துறையினருக்கு தகவல் தெரிவிக்கப்பட்டது. இதைதொடர்ந்து சம்பவ இடத்துக்கு மோப்ப நாய்களுடன் நேரில் வந்த காவல் துறையினர் மேற்கொண்டனர்.

மேலும், கொள்ளை சம்பவம் தொடர்பாக வழக்குப்பதிவு செய்த காவல் துறையினர் விசாரணையில் ஈடுபட்டு வருகின்றனர்.