கோவை மாவட்டம் பொள்ளாச்சி அருகே கிணத்துக்கடவு கருப்பம்பாளையம் பகுதியில் வசித்துவருபவர் குமார் (30). இவர் தனது மனைவி முத்துமாலை, பத்து மாத மகள் தர்ஷினியுடன் வசித்து வருகிறார்.
நேற்று காலை முத்துமாலை தனது வீட்டில் இருந்தபோது ஆத்திரத்துடன் நுழைந்த குமாரின் தந்தையான செல்வராஜ்கைக்குழந்தையுடன் இருந்த முத்துமாலையை கீழே தள்ளி அவரிடமிருந்து குழந்தை தர்ஷினியை பிடுங்கி வாகனத்தில் கடத்திச்சென்றுவிட்டார். இது குறித்து முத்துமாலை தனது கணவர் குமாருக்கு தெரிவிக்கவே இருவரும் சேர்ந்து குழந்தையை தேடிப் பார்த்துள்ளனர். ஆனால் இரவு வரை குழந்தை கிடைக்காததால், குமார் கிணத்துக்கடவு காவல் துறையிடம் புகார் செய்தார்.
இதனையடுத்து வழக்குப்பதிவு செய்து விசாரித்த கிணத்துக்கடவு காவல் துறையினர் செல்வராஜின் இருப்பிடத்தைக் கண்டுபிடிக்க செல்போன் டவர் மூலம் ஆய்வு செய்தனர். அதன் மூலம் அவர் கிணத்துக்கடவு ரயில் நிலையத்தில் இருப்பதாகத் தெரிய வந்தது. இதனையடுத்து காவல் துறையினர் அங்கு விரைந்து செல்வராஜை கைது செய்தனர். அப்போது அவரிடம் நடத்திய விசாரணையில் அதிர்ச்சிக்குரிய தகவல் வெளியாகியது.
அப்போது, கிணத்துக்கடவுக்கு அருகே உள்ள ஒத்தக்கால்மண்டபம்-தொப்பம்பாளையம் பிரிவு பகுதியில் வைத்து குழந்தையை தான் கொலை செய்ததாக செல்வராஜ் தெரிவித்துள்ளார். இதைக்கேட்டதும் சம்பவ இடத்திற்கு செல்வராஜை அழைத்துசென்ற காவல் துறையினர் குழந்தையின் உடலை கைப்பற்றி உடற்கூறு ஆய்வுக்காக கோவை அரசு மருத்துவமனைக்கு அனுப்பிவைத்தனர்.
விசாரணையின்போது செல்வராஜுக்கு மற்றொரு மனைவி இருந்ததும். இரண்டாம் மனைவி அவரைவிட்டு பிரிந்து சென்றுள்ளார் என்பதும் தெரியவந்துள்ளது. இரண்டாம் மனைவி சக்திகனி அவரைவிட்டு பிரிந்துசெல்ல தனது மகனும், மருமகளும்தான் காரணம் என நினைத்து குழந்தையை செல்வராஜ் கடத்தி சென்றுள்ளார். மகன் காவல் துறையில் புகார் செய்த தகவல் அறிந்ததும் ஆத்திரத்தில் 10 மாத குழந்தையை பேத்தி என்றும் பாராமல் செங்கல்லால் தாக்கி கொடூரமாக கொலை செய்தது தெரியவந்தது.
