வழக்குரைஞர் வெட்டி கொல்லப்பட்ட வழக்கு - எட்டு பேரை 4 நாள்கள் விசாரிக்க நீதிமன்றம் அனுமதி!

வழக்குரைஞரை வெட்டி கொலை செய்ததாக சரணடைந்த எட்டு பேரை நான்கு நாட்கள் காவலில் எடுத்து விசாரிக்க எழும்பூர் நீதிமன்றம் உத்தரவிட்டுள்ளது.

சென்னை வில்லிவாக்கத்தில் வழக்குரைஞர் ராஜேஷை, கடந்த 4ஆம் தேதி எட்டு பேர் கொண்ட கும்பல் சரமாரியாக வெட்டி கொலை செய்தது. இதன் சிசிடிவி காட்சிகளை ஆய்வு செய்து காவல்துறையினர் குற்றவாளிகளை தேடி வந்தனர். இதனிடையே கடந்த 6ஆம் தேதி வாணியம்பாடி நீதிமன்றத்தில் ராஜேஷை கொலை செய்ததாக ரவுடி முருகேசன், ரமேஷ், அருண், ஸ்ரீநாத், வைரமணி, ருக்கேஷ்வரன், சஞ்சய், கிஷோர் குமார் ஆகியோர் சரணடைந்தனர்.

இவர்கள் ரவுடி சூழ்ச்சி சுரேஷின் கூட்டாளிகள் என்பதும், அதேசமயம் கொலை செய்யப்பட்ட வழக்குரைஞர் ராஜேஷ், எதிரணியான ரவுடி கதிரவன், தொப்பை கணேசன் ஆகியோருக்கு ஆதரவாக செயல்பட்டு வழக்குகளை முடித்து கொண்டு வந்ததும் தெரியவந்தது. இதில் ஆத்திரமடைந்த எதிர் தரப்பு கடந்த ஏழு ஆண்டுகளாக காத்திருந்து ராஜேஷை கொலை செய்ததும் விசாரணையில் தெரியவந்தது.

நீதிமன்றத்தில் சரணடைந்த எட்டு பேரையும் காவலில் எடுத்து விசாரணை செய்ய வில்லிவாக்கம் காவல்துறையினர் அனுமதி கோரினர். இதைத்தொடர்ந்து இன்று (அக்.14) வாணியம்பாடியில் இருந்து சென்னை எழும்பூர் நீதிமன்றத்திற்கு அழைத்து வரப்பட்ட குற்றவாளிகள் எட்டு பேரையும், 13 ஆவது குற்றவியல் நீதிபதியான பாலகிருஷ்ணன் முன்பு ஆஜர்படுத்தினர். இந்த வழக்கை விசாரித்த நீதிபதி, குற்றவாளிகளை நான்கு நாட்கள் காவலில் எடுத்து விசாரிக்க அனுமதி அளித்து உத்தரவிட்டார்.