சோலார் நிறுவனம் அமைத்துத் தருவதாகக் கூறி ரூ. 1.50 கோடியை ஏமாற்றியவர் மீது நடவடிக்கை எடுக்க வேண்டும் !

விருதுநகர் : சோலார் நிறுவனம் அமைத்துத் தருவதாகக் கூறி ரூ. 1.50 கோடியை ஏமாற்றியவரிடமிருந்து தனது பணத்தை மீட்டுத் தரக்கோரி பாதிக்கப்பட்ட நபர், மாவட்டக் காவல் கண்காணிப்பாளரிடம் புகார் மனு ஒன்றினை அளித்துள்ளார்.

விருதுநகர் மாவட்டத்தை அடுத்துள்ள வீரசோழன் பகுதியைச் சேர்ந்தவர் பசீர். இவர் சென்னையில் பசுமை சக்தி என்ற பெயரில் சூரிய ஒலியில் இயங்கும் சோலார் ஆற்றல் பொருள்களை விற்பனை செய்துவருகிறார்.

சென்னையைச் சேர்ந்த கலியூர் ரஹ்மான் என்பவருக்கு சோலார் நிறுவனம் அமைத்துத் தருவதாகக் கூறி கடந்த நான்காண்டுகளில் பல்வேறு வகையில் ரூபாய் 1.50 கோடியை அவர் பெற்றுள்ளதாகக் கூறப்படுகிறது.

தற்போதுவரை கலியூர் ரஹ்மானுக்கு, பசீர் சோலார் நிறுவனம் அமைத்துத் தரவில்லை என அறியமுடிகிறது.

இந்நிலையில், தான் கொடுத்த பணத்தை திரும்பத்தருமாறு ரஹ்மான் கேட்டதற்குத் தர மறுத்ததோடு, அவரை கொலைசெய்து விடுவேன் என பசீர் மிரட்டல் விடுத்துள்ளதாக தெரிகிறது.

இதனால் அச்சமடைந்த கலியூர் ரஹ்மான், இதுகுறித்து விருதுநகர் மாவட்ட காவல் கண்காணிப்பாளரிடம் புகார் மனு ஒன்றினை இன்று (நவ. 19) அளித்துள்ளார்.

அந்த மனுவில், " பசுமை சக்தி என்ற பெயரில் சூரிய ஒளியில் இயங்கும் மின்சாதனப் பொருள்களை விற்பனை செய்துவரும் பசீர், சோலார் நிறுவனம் அமைத்துத் தருவதாகக் கூறி, இதுவரை என்னிடம் ஒரு கோடியே 61 லட்சத்து 17 ஆயிரத்து 326 ரூபாயை வாங்கியுள்ளார். அதற்கான ஆதாரங்கள் என்னிடம் உள்ளன.

சோலார் நிறுவனமும் ஆரம்பித்துத் தராமல், கொடுத்தப் பணத்தையும் திரும்பத் தராமல் பசீர் தொடர்ந்து ஏமாற்றி வருகிறார்.

பணத்தைக் கேட்டால் குடும்பத்தோடு கொலை செய்துவிடுவேன் என மிரட்டல் விடுக்கிறார்.

எனக்கும், என்னுடைய குடும்பத்திற்கும் காவல்துறை உரிய பாதுகாப்பை வழங்க வேண்டும். அவரிடமிருந்து எனது பணத்தை மீட்டுத்தர வேண்டும்.

அத்துடன் கொலை மிரட்டல் விடுத்த பசீர், அக்பர், ரஷாக், மீரா, பர்சுக் ஆகியோரை கைது செய்ய வேண்டும்" என கோரிக்கை விடுத்துள்ளார்.