அடுத்தாண்டு முதல் நியூயார்க் பள்ளிகளில் தீபாவளி விடுமுறை

2023ஆம் ஆண்டு முதல் தீபாவளி பண்டிகை அன்று நியூயார்க்கில் உள்ள பொதுப் பள்ளிகளுக்கு விடுமுறை அளிக்கப்படும் என்று மேயர் எரிக் ஆடம்ஸ் தெரிவித்துள்ளார்.

நியூயார்க்: வரும் 24ஆம் தேதி உலகெங்கிலும் தீபாவளி திருநாள் கொண்டாடப்பட உள்ளது. இந்த நிலையில் நியூயார்க் மேயர் எரிக் ஆடம்ஸ் நேற்று (அக் 20) நடைபெற்ற செய்தியாளர் சந்திப்பில், “நியூயார்க் நகரில் தீபாவளியை முன்னிட்டு அடுத்தாண்டு (2023) முதல் பொதுப் பள்ளிகளுக்கு விடுமுறை அளிக்கப்படும்.

தீபாவளி குறித்து அறிய குழந்தைகளை ஊக்குவிக்கப் போகிறோம். இனி தீபாவளியை கொண்டாடுவது என்றால் என்ன என்பதையும், அந்த நாளை போலவே தங்களுக்குள் எப்படி ஒளி சுடரையேற்றுவது என்பது பற்றியும் குழந்தைகள் பேசத் தொடங்குவார்கள்” என கூறினார்.

தொடர்ந்து மாநில சட்டப்பேரவை உறுப்பினரான முதல் தெற்காசிய அமெரிக்க பெண் ஜெனிபர் ராஜ்குமார், “உலகெங்கிலும் உள்ள ஒரு பில்லியனுக்கும் அதிகமான மக்களால் கொண்டாடப்படும் தீபாவளி திருநாள், இருளின் மீது ஒளி மற்றும் தீமையின் மீது நன்மை என்ற அடையாள வெற்றியைக் குறிக்கிறது.

தீபாவளியைக் கொண்டாடும் இந்து, பௌத்த, சீக்கிய மற்றும் சைன மதங்களைச் சேர்ந்த 2 லட்சம் நியூயார்க் மக்களை அங்கீகரிக்கும் நேரம் வந்துவிட்டது. இருபது ஆண்டுகளுக்கும் மேலாக, நியூயார்க்கில் உள்ள தெற்காசியர்களும் இந்தோ-கரீபியர்களும் தீபாவளி அன்று பள்ளி விடுமுறைக்காக போராடி வருகின்றனர்.

நியூயார்க் நகர பள்ளி காலண்டரில் தீபாவளி பள்ளி விடுமுறைக்கு போதிய இடமில்லை என்று மக்கள் கூறியுள்ளனர். ஆனால், தற்போது எனது சட்டம் அந்த இடத்தை உருவாக்கி விடுமுறையை அளித்துள்ளது" என்றார்.

இதையும் படிங்க:இங்கிலாந்து பிரதமர் லிஸ் டிரஸ் ராஜினாமா