Apple Iphone 15 Launch: ஐபோன் பயனாளர்களுக்கு ஹேப்பி நியூஸ் - சூப்பர் அப்டேட் கொடுத்த ஆப்பிள் நிறுவனம்!

Apple iPhone 15 Pro: இன்றைய நவநாகரீக இளைய தலைமுறையினரின் ஏகோபித்த ஆதரவை பெற்று இருக்கும், ஆப்பிள் நிறுவனம், அதன் புதிய தயாரிப்புகளின் மூலம், முடிசூடா மன்னன் என்பதை மீண்டும் நிரூபித்து உள்ளது.

கியூபர்டினோ (அமெரிக்கா):ஆப்பிள் நிறுவனம், ஒவ்வொரு ஆண்டும், செப்டம்பர் மாதத்தில், புதிய ஐபோன் சீரிஸ்களை தொடர்ந்து அறிமுகம் செய்து வருகிறது. அந்த வகையில், ஐபோன் 15 சீரிஸ் வகை இந்த ஆண்டு அறிமுகப்படுத்தப்பட்டு உள்ளது. அமெரிக்காவின் கலிபோர்னியா மாகாணத்தில் உள்ள கியூபர்டினோவில், இதற்கான அறிமுக நிகழ்ச்சி கோலாகலமாக நடைபெற்றது.

ஐபோன் ப்ரோ, ஐபோன் ப்ரோ மேக்ஸ் போன்கள் அறிமுகப்படுத்தப்பட்ட நிலையில், அது பார்வையாளர்களிடம் மிகுந்த வரவேற்பை பெற்று உள்ளன என்று கூறினால் அது மிகையல்ல. ஐபோன் 15 ப்ரோ மேக்ஸ் மாடல் போனில், அமெரிக்காவின் விண்வெளி அமைப்பான நாசாவின் மார்ஸ் ரோவரில் பயன்படுத்தப்பட்ட கிரேட் 5 டைட்டானியம் சேஸ் இடம்பெற்று உள்ளது. இந்த போன், 120ஹெர்ட்ஸ் ரெஃப்ரெஷ் விகிதம் உடனான பெரிய அளவிலான 6.7 அங்குல டிஸ்பிளேவை, தன்னகத்தே கொண்டுள்ளது.

இதுதொடர்பாக, ஆப்பிள் நிறுவனம் வெளியிட்டு உள்ள செய்திக்குறிப்பில், இந்த ஐபோனில். ஸ்டெயின்லெஸ் இரும்பு பயன்படுத்தப்படாததால், இது லேசான எடை கொண்டதாக உள்ளது. மேலும், ஐபோனில் ஆக்சன் பட்டனுக்கும் அருகே இருந்த தனித்துவம் மிகுந்த சுவிட்ச் இதில் இடம்பெறவில்லை. அதற்குப் பதிலாக, புதிய கஸ்டமைஸ் செய்யப்பட்ட ஆக்சன் பட்டன் இடம்பெற்று உள்ளது.

இந்த ஐபோன், ஒரு வினாடிக்கு 35 டிரில்லியன் செயல்பாடுகளுக்கான ஆதரவுடன் புதிய கட்டமைப்பு உடன், புதிய ஏ17 ப்ரோ சிப் மூலம் இயங்கும் வகையில் உருவாக்கப்பட்டு உள்ளது. இது ரே டிரேசிங்கிற்கான தகவமைப்பு உடன், மேம்படுத்தப்பட்ட GPU செயல்திறனையும் தன்னகத்தே கொண்டு உள்ளது குறிப்பிடத்தக்கது.

அதேபோல், இந்த மாடல் ஐபோனில், யூஎஸ்பி-3 சப்போர்ட் அறிமுகப்படுத்தப்பட்டு உள்ளது. இது ஆப்பிள் நிறுவன வரலாற்றில், மிகப்பெரிய மற்றும் மிகவும் முக்கியமான மாற்றம் ஆகும். 24 மிமீ 35 மிமீ மற்றும் 38 மிமீ லென்ஸ் மோட்கள் உடன் மேம்படுத்தப்பட்ட 48 மெகாபிக்சல் முதன்மை கேமராக்கள், இதில் இடம்பெற்று உள்ளன.

மேலும் இதில் உள்ள 12-மெகாபிக்சல் அல்ட்ரா-வைட்-ஆங்கிள் கேமரா மற்றும் 120 மிமீ ஃபோக்கல் லென்த் பெரிஸ்கோப் சென்சார் உடனான 12-மெகாபிக்சல் 5x டெலிஃபோட்டோ கேமரா, உங்களுக்கு புதுவித அனுபவத்தை வழங்கும் என்பதை உறுதியாக சொல்ல முடியும். இந்தியாவில் ஐபோன் 15-ன் ஆரம்ப விலை 79,900 ரூபாய் ஆக நிர்ணயிக்கப்பட்டு உள்ளது.

மேலும் ஐபோன் 15 ப்ளஸின் ஆரம்ப விலை 89,900 ரூபாயாகவும், ஐபோன் 15 ப்ரோ போனின் ஆரம்ப விலை 1,34,900 ரூபாயாகவும், மேலும், ஐபோன் 15 மேக்ஸ் ப்ரோவின் ஆரம்ப விலை 1,59,900 ரூபாய் எனவும் நிர்ணயிக்கப்பட்டு உள்ளது. இந்த போன்களுக்கான முன்பதிவு செப்டம்பர் 15ஆம் தேதி துவங்குவதாகவும், செப்டம்பர் 22ஆம் தேதி முதல், இந்த ஐபோன்கள், வாடிக்கையாளர்களின் கைகளுக்கு கிடைக்கும் என்று அறிவிக்கப்பட்டு உள்ளது.