கழிப்பறையில் கேமாரா வைத்தார்கள் : பிஎம்எல்என் துணைத்தலைவர் மரியம் நவாஸ் பகீர் புகார்

சர்க்கரை ஆலை ஊழல் வழக்கில் கைது செய்யப்பட்டபோது தனது சிறை அறை மற்றும் கழிப்பறையில் கேமராக்கள் பொருத்தப்பட்டன என பாகிஸ்தான் முஸ்லீம் லீக் நவாஸ் கட்சித் துணைத் தலைவர் மரியம் நவாஸ் புகார் தெரிவித்துள்ளார்.

இஸ்லாமாபாத்: பாகிஸ்தான் பிரதமர் இம்ரான் கானுக்கு எதிராக, கராச்சி நகரில் அந்நாட்டு எதிர்கட்சித் தலைவர்கள் இணைந்து போராட்டத்தில் ஈடுபட்டனர். இதனைத் தொடர்ந்து, பாகிஸ்தான் முஸ்லீம் லீக் நவாஸ் கட்சி துணைத் தலைவர் மரியம் நவாஸின் கணவர் சஃப்தார் அவான் கைது செய்யப்பட்டார்.

இந்த சம்வத்தின்போது சிந்து மாகாணத்தில் உயர் அதிகாரியை அந்நாட்டு ராணுவ வீரர்கள் கடத்திச் சென்று அவமித்ததாகக் கூறி, அந்நாட்டு போலீஸார் போராட்டத்தில் ஈடுபட்டனர். இந்த போராட்டத்தின்போது போலீஸார், ராணுவத்தினர் இடையே மோதல் ஏற்பட்டதாக, தகவல் வெளியானது. இதனை அடுத்து அங்கு நிகழ்ந்த குண்டுவெடிப்பு சம்வத்தில், 5 பேர் உயிரிழந்தனர்.

இது தொடர்பாக பேசிய மரியம் நவாஸ், " பாகிஸ்தான் நாட்டு பிரதமர் இம்ரான் கான் ஒரு பயனற்ற மனிதர், நாட்டில் என்ன நடக்கிறது என்பதுகூட அவருக்குத் தெரியவில்லை. அதேப் போல் அவரை யாரும் பொருட்படுத்தவில்லை.தானும், தனது கணவர் சஃப்தாரும் வீட்டில் உறங்கி கொண்டிருக்கையில், ராணுவ அதிகாரிகள் தங்களது வீட்டின் கதவை உடைத்துக்கொண்டு, தனது கணவரையும், சிந்து மாகாணக் காவல் உயர் அதிகாரியையும் கைது செய்து கடத்திச்சென்றனர்.

நாட்டில் இப்படி பெரும் சம்பவம் நிகழ்ந்துக்கொண்டிருக்கையில், இம்ரான் கான் மட்டும், தனது இல்லத்தில் நன்கு உறங்கிக்கொண்டிருந்தார். நாட்டில் நிகழும் பிரச்சனைகளுக்கும், பரவும் கொடிய நோய்களுக்கும் ஒரே தீர்வு, இம்ரான் கான் தலைமையிலான போலியான அரசை வீட்டிற்கு அனுப்புவதுதான். அவருடைய இந்த ஆட்சியில், சர்க்கரை ஆலை ஊழல் புகார் தொடர்பாக நான் கைது செய்யப்பட்ட போது, என்னுடைய சிறை அறையிலும், கழிப்பறையிலும் கேமராக்கள் பொருத்தப்பட்டன. பெண்கள் இவ்வாறுதான் சிறையில் மிகவும் மோசமாக நடத்தப்படுகிறார்கள். நாட்டில் உள்ள பெண்களுக்கு பாதுகாப்பு இல்லை " என்று குற்றம்சாட்டினார்.