கிரே பட்டியலில் பாகிஸ்தான் தொடருமா?

கிரே பட்டியலில் பாகிஸ்தான் இடம்பெற்றுள்ள நிலையில், பண மோசடி மற்றும் பயங்கரவாத நிதி தடுப்பு அமைப்பின் கூட்டம் வீடியோ கான்பரன்சிங் மூலம் நடைபெற உள்ளது.

பண மோசடியை தடுக்கும் வகையில், 1989 ஆம் ஆண்டு பண மோசடி மற்றும் பயங்கரவாத நிதி தடுப்பு அமைப்பான எப்.ஏ.டி.எப் தொடங்கப்பட்டது. 2001ஆம் ஆண்டு பயங்கரவாத செயல்களுக்கு நிதியளிக்கும் அமைப்புகளுக்கு எதிராக இந்த அமைப்பு நடவடிக்கை எடுக்கத் தொடங்கியது.

அரசுகளுக்கு இடையேயான இந்த அமைப்பு, கிரே பட்டியல் என்ற ஒன்றை தயாரித்தது. நிதி மோசடி செய்வதற்கு ஏதுவான நாடுகளையும், பயங்கரவாத அமைப்புகளுக்கு ஆதரவான நாடுகளையும் இந்தப் பட்டியலில் சேர்த்தது. இந்தப் பட்டியலில் உள்ள நாடுகளுக்கு சர்வதேச நிதி அமைப்புகள் கடன் அளிக்க தடைவிதித்தது.

இந்தப் பட்டியலில் இருந்து வெளியேற 27 அம்ச கோரிக்கையை நிறைவேற்ற வேண்டும் என பாகிஸ்தானுக்கு இந்த அமைப்பு வலியுறுத்தியது. ஆனால் இதில் 13 அம்ச கோரிக்கையை மட்டுமே பாகிஸ்தான் நிறைவேற்றியதாக ஊடகங்களில் செய்தி வெளியானது.

இந்நிலையில், வீடியோ கான்பரன்சிங் மூலம் இந்த அமைப்பின் கூட்டம் அக்டோபர் 21ம் தேதி முதல் 23ம் தேதி வரை நடைபெற உள்ளது. இந்த கூட்டத்தின்போது கிரே பட்டியலில் இருந்து பாகிஸ்தான் வெளியேற்றப்படுமா அல்லது தொடருமா என்ற முடிவு எடுக்கப்படும் என கூறப்பட்டுள்ளது.