நாசா நிர்வாக பதவியிலிருந்து விலகிய ட்ரம்ப் ஆதரவாளர்!

அமெரிக்காவின் புதிய அதிபராக ஜோ பைடன் பதவியேற்றுள்ள நிலையில், நாசா நிர்வாகி ஜிம் பிரிடென்ஸ்டைன் தனது பதவியை விட்டு விலகியுள்ளார். இந்த பதவிக்கு முதல் முறையாக பெண் ஒருவர் நியமிக்கப்படலாம் என்று கூறப்படுகிறது.

நியூயார்க்: அமெரிக்க விண்வெளி ஆராய்ச்சி நிறுவனமான நாசாவின் நிர்வாகி தன் பதவியை விட்டு விலகியுள்ளார்.

அமெரிக்க விண்வெளி ஆராய்ச்சி நிறுவனமான நாசாவின் நிர்வாகியாக ஜிம் பிரிடென்ஸ்டைன், 2018ஆம் ஆண்டு அப்போதைய அதிபர் டிரம்பால் நியமனம் செய்யப்பட்டார். தற்போது அமெரிக்காவின் புதிய அதிபராக ஜோ பைடன் பதவி ஏற்றுள்ள நிலையில், நாசாவின் தலைமை நிர்வாகி பதவியை விட்டு அவர் விலகியுள்ளார். தற்போது இந்த பதவிக்கு முதல் முறையாக பெண் ஒருவரை நியமிக்க திட்டமிட்டுள்ளதாக அதிபர் அலுவலக வட்டாரங்கள் தகவல்கள் தெரிவிக்கின்றன.

தனது முடிவு நாசாவின் சிறந்த நலன்களுக்கு உதவும் என்று பிரிடென்ஸ்டைன் தெரிவித்துள்ளார். மேலும் தேசிய விண்வெளி கவுன்சில், தேசிய பாதுகாப்பு கவுன்சில் ஆகியவற்றுக்கு தேவையானது, அமெரிக்க அதிபருடன் நெருங்கிய உறவைக் கொண்ட ஒருவர். நிர்வாகத்தால் நம்பப்படும் ஒருவர். அமெரிக்க புதிய நிர்வாகத்தில் நான் அதற்கு சரியான நபராக இருக்க மாட்டேன் என்று நினைக்கிறேன் என்று கூறியுள்ளார்.

பிரிடென்ஸ்டைனை நியமிக்க அதிபர் டொனால்ட் டிரம்ப் எடுத்த முடிவு ஆரம்பத்தில் சர்ச்சையை ஏற்படுத்தியது. ஆனால் ​​பிரிடென்ஸ்டைன் பரந்த அறிவியல் ஒருமித்த கருத்தை முழுமையாக ஏற்றுக்கொண்டதை தெளிவுபடுத்தினார். மேலும், நாசாவின் காலநிலை ஆராய்ச்சி முயற்சிகளுக்கு அவர் ஆதரவளித்தார்.

இந்த ஆண்டின் தொடக்கத்தில் ஸ்பேஸ் எக்ஸின் டிராகன் விண்கலம் இரண்டு நாசா விண்வெளி வீரர்களை சர்வதேச விண்வெளி நிலையத்திற்கு கொண்டு சென்றபோது வணிக குழு திட்டம் உச்சக்கட்டத்தை எட்டியது. மனிதர்களை சந்திரனுக்கு அனுப்புவதற்கான நாசாவின் திட்டங்களை வழிநடத்தவும் பிரிடென்ஸ்டைன் உதவினார் என்பது குறிப்பிடத்தக்கது.