அதிபர் தேர்தல் குறித்து விசாரணை நடத்திய முல்லர் அறிக்கை வெளியானது....

நியூயார்க்: அதிபர் டெனால்ட் ட்ரம்ப் 2016ஆம் நடந்த அதிபர் தேர்தலின் போது ரஷ்யாவுடன் சேர்ந்து சதி செய்தாரா என்ற கோணத்தில் விசாரித்து வந்த சிறப்பு விசாரணை அதிகாரி ராபர்ட் முல்லரின் அறிக்கை இரண்டாண்டுகளுக்கு பின் வெளியாகியுள்ளது.

கடந்த 2016ம் ஆண்டு நடைபெற்ற அதிபர் தேர்தலில் வெற்றிப்பெற்ற டொனால்ட் ட்ரம்பின் வெற்றியில் ரஷ்யாவின் தலையீடு உள்ளதாக எதிர்கட்சிகள் குற்றம் சாட்டின. இதையடுத்து இதுதொடர்பாக விசாரணை நடத்த சிறப்பு அதிகாரியாக ராபர்ட் முல்லர் என்பவர் நியமனம் செய்யப்பட்டார். அவர் கடந்த இரண்டாண்டுகளாக விசாரணை மேற்கொண்டு வந்த நிலையில் விசாரணையின் முதல் அறிக்கை தற்போது வெளியாகியுள்ளது.

அதில் 2016ஆம் ஆண்டு நடைபெற்ற அமெரிக்க அதிபர் தேர்தலின்போது அமெரிக்காவின் தற்போதைய அதிபர் டொனால்டு டிரம்ப் ரஷ்யாவுடன் சேர்ந்து எவ்வித சதித்திட்டத்திலும் ஈடுபடவில்லை என்று சிறப்பு விசாரணை அதிகாரி ராபர்ட் முல்லரின் அறிக்கையில் குறிப்பிடப்பட்டுள்ளது.

இதுகுறித்து முல்லர் விசாரணை அறிக்கையின் முக்கிய கூறுகளை அட்டர்னி ஜெனரல் வில்லியம் பார் அந்நாட்டு நாடாளுமன்றத்தில் தாக்கல் செய்துள்ளார். இதையடுத்து ட்விட்டரில் பதிவிட்டுள்ள அமெரிக்க அதிபர் டிரம்ப், “கூட்டு சதியும் இல்லை, நீதிக்கு எவ்வித தடையும் இல்லை” என்று தெரிவித்துள்ளார்.

அதிபர் டிரம்ப்

முல்லரின் விசாரணையை அடிக்கடி பழிவாங்கும் நடவடிக்கை என்று விமர்சித்து வந்த டிரம்ப், “இதுபோன்ற விஷயங்களை நாடு கடந்து செல்ல வேண்டியது அவமானகரமான ஒன்று” என்றும் தெரிவித்துள்ளார்.2016ஆம் ஆண்டு நடந்த அமெரிக்க அதிபர் தேர்தலில் டிரம்ப் வெற்றி பெற்றதற்கு பின்புலத்தில் ரஷ்யா உள்ளதா என்ற கேள்விக்கான பதிலை தேடி கடந்த இரண்டு ஆண்டுகளாக பல கட்ட விசாரணை நடத்தி வந்தார் ராபர்ட் முல்லர். அதன் ஒரு பகுதியாக டிரம்பின் பல நெருங்கிய முன்னாள் உதவியாளர்கள் கைது செய்யப்பட்டனர், சிறையில் அடைக்கப்பட்டனர்.

“இந்த அறிக்கையில் அதிபர் குற்ற செயலில் ஈடுபட்டார் என்று குறிப்பிடப்படாத அதே சூழ்நிலையில், அவர் குற்றமற்றவர் என்றும் குறிப்பிடப்படவில்லை” என்று அந்த அறிக்கையில் முல்லர் குறிப்பிட்டுள்ளார்.

• அறிக்கையில் என்ன கூறப்பட்டுள்ளது?

2016ஆம் ஆண்டு நடந்த அமெரிக்க அதிபர் தேர்தலில் ரஷ்யாவின் தலையீடு உள்ளதா என்பது குறித்த இந்த விசாரணை அறிக்கையின் முக்கிய கூறுகளை அமெரிக்க நாடாளுமன்றத்தில் அந்நாட்டின் அட்டர்னி ஜெனரல் பார் தாக்கல் செய்துள்ளார். அதில்,

“அமெரிக்காவை சேர்ந்த குடிமகனோ அல்லது டிரம்பின் பரப்புரைக் குழுவை சேர்ந்தவர்களோ ரஷ்யாவுடன் சேர்ந்து சதித்திட்டமோ அல்லது வேண்டுமென்றே ஒத்துழைக்கவோ இல்லை என்று சிறப்பு விசாரணையில் தெரியவந்துள்ளது” என்று கடிதத்தின் முதல் பகுதியில் குறிப்பிடப்பட்டுள்ளது.

அந்த கடிதத்தின் இரண்டாவது பகுதியில் நீதியை தடைசெய்வது தொடர்பான குற்றச்சாட்டுகள் குறித்து விளக்கப்பட்டுள்ளது.“நீதியை தடை செய்யும் வகையில் ஏதாவது செயல்பாடு இருந்துள்ளதா என்பது குறித்து சிறப்பு விசாரணையின் அறிக்கையில் எவ்வித வகையிலும் இறுதி முடிவு குறிப்பிடப்படவில்லை.”

நீதிக்கு தடை ஏற்படுத்தும் வகையிலான குற்றத்தை அதிபர் டிரம்ப் இழைத்தார் என்ற குற்றச்சாட்டை நிரூபிப்பதற்கு தேவையான அளவு ஆதாரங்கள் கிடைக்கவில்லை என்று தனது கடிதத்தில் மேலும் தெரிவித்துள்ளார். முல்லரின் விசாரணை அறிக்கையிலிருந்து விவரங்களை வெளியிட உள்ளதாக அந்த கடிதத்தின் குறிப்பிட்டுள்ள பார், ஆனால் அதிலுள்ள சில தகவல்கள் கட்டுப்பாட்டுக்கு உட்பட்டது என்று கூறுகிறார்.