ட்ரம்ப் ஒரு இனவெறியர் - கமலா ஹாரிஸ் பரபரப்பு குற்றச்சாட்டு!

வாஷிங்டன்: ஜனநாயகக் கட்சியின் துணை அதிபர் வேட்பாளர் கமலா ஹாரிஸ், அதிபர் ட்ரம்பை இனவெறியர் என்று விமர்சித்துள்ளார்.

அமெரிக்க அதிபர் தேர்தல் வரும் நவம்பர் 3ஆம் தேதி நடைபெற உள்ளது. இதில், குடியரசுக் கட்சி வேட்பாளராக தற்போதைய அதிபர் டொனால்ட் ட்ரம்ப் மீண்டும் போட்டியிடுகிறார். ஜனநாயகக் கட்சி வேட்பாளராக ஜோ பிடன் போட்டியிடுகிறார்.

அமெரிக்காவில் நடத்தப்பட்ட தேர்தல் கருத்து கணிப்பில், இதுவரை ஜனநாயகக் கட்சியே முன்னிலையில் உள்ளது. காலங்காலமாக குடியரசு கட்சிக்கு வாக்களித்து வரும் ஜார்ஜியா போன்ற மாகாணங்களிலும்கூட, இம்முறை ஜனநாயகக் கட்சியே வெற்றிபெற வாய்ப்புள்ளதாக கருத்து கணிப்புகள் தெரிவிக்கின்றன.

இந்நிலையில், ஜார்ஜியா மாகாணத்தில் நடைபெற்ற பரப்புரைக் கூட்டத்தில் பேசிய ஜனநாயக கட்சியின் துணை அதிபர் வேட்பாளர் கமலா ஹாரிஸ், "ட்ரம்ப் இனவெறியர் என்று நீங்கள் நினைக்கிறீர்களா என மக்கள் என்னிடம் அடிக்கடி கேட்பார்கள். ஆம், அவர் இனவெறி கொண்டவர் என்றே நான் நினைக்கிறேன்.

அவர் ஏதோ ஒரு முறை தெரியாமல் தவறாக பேசுபவர் அல்ல. அவரது பேச்சுகளில் நீங்கள் ஒரு தொடர்பை பார்க்கலாம். தொடர்ந்து ஆப்பிரிக்க அமெரிக்கர்களுக்கு எதிரான கருத்துகளையே அவர் தெரிவித்துவருகிறார். அமெரிக்காவில் காலங்காலமாக இனவெறி இருக்கிறது என்பதை ஏற்றுக்கொண்டு, அதைத் தடுக்க நடவடிக்கை எடுக்கும் ஒரு நபரே தற்போது நமக்கு தேவை" என்றார்.

ஜார்ஜியா மாகாணத்தில் தேர்தல் மிக நெருக்கமாக இருக்கும் என்று கருத்துக்கணிப்புகள் வெளியாகியுள்ள நிலையில், கமலா ஹாரிஸின் இந்தப் பேச்சு ஆப்பிரிக்க அமெரிக்கர்களின் வாக்குகள் ஜனநாயகக் கட்சிக்கு வருவதை உறுதி செய்யும் என்று எதிர்பார்க்கப்படுகிறது.

இதையும் படிங்க: பிடன் ஆட்சிக்கு வந்தால் கச்சா எண்ணெய் காலி?