சென்னை:நடிகர் விஜய் தமிழ் சினிமாவின் முன்னணி நடிகராக வலம் வருபவர். இவரது படங்கள் தற்போது பான் இந்தியா அளவில் ரசிக்கப்படுகிறது. இவரது நடிப்பில் கடைசியாக வெளியான வாரிசு திரைப்படம் தமிழ் மற்றும் தெலுங்கில் எடுக்கப்பட்டது. ஆனாலும், மற்ற மொழிகளிலும் வெளியிடப்பட்டது. தமிழில் சுமாராக போனாலும் மற்ற மொழிகளில் ரசிக்கப்பட்டது.
நடிகர் விஜய்யின் மார்க்கெட் தற்போது உச்சத்தில் உள்ளதால் இவரை வைத்து படம் இயக்க தயாரிப்பாளர்கள் அடுத்தடுத்து காத்துக் கொண்டு இருக்கின்றனர். இந்த நிலையில், தற்போது விஜய் லோகேஷ் கனகராஜ் இயக்கத்தில், மனோஜ் பரமஹம்சா ஒளிப்பதிவில், செவன் ஸ்கிரீன் நிறுவனத்தின் தயாரிப்பில் லியோ என்ற படத்தில் நடித்து வந்தார். இந்தப் படத்தில் த்ரிஷா, மன்சூர் அலிகான், மிஷ்கின், அர்ஜுன், கௌதம் மேனன், பாலிவுட் நடிகர் சஞ்சய் தத் உள்ளிட்ட ஏராளமான நட்சத்திரங்கள் நடித்து உள்ளனர்.
இந்தப் படத்திற்கு இசை அமைப்பாளர் அனிருத் இசை அமைத்து உள்ளார். ஏற்கனவே இப்படத்தில் இருந்து ‘நா ரெடி’ என்ற பாடல் வெளியாகி விஜய் ரசிகர்கள் மத்தியில் மிகுந்த வரவேற்பைப் பெற்று வருகிறது. இந்த நிலையில், விஜய் ரசிகர்கள் இரண்டாவது பாடல் எப்போது வெளியாகும் என்று ஆர்வமுடன் காத்துக் கொண்டிருக்கின்றனர். சமீபத்தில் ஒரு விழாவில் லியோ படத்தின் இயக்குநரான லோகேஷ் கனகராஜிடம் விஜய் ரசிகர்கள் இரண்டாவது பாடல் எப்போது வெளியாகும் என கேட்டனர்.