சென்னை:மாரி செல்வராஜ் இயக்கத்தில் உதயநிதி ஸ்டாலின், பகத் பாசில், வடிவேலு, கீர்த்தி சுரேஷ் உள்ளிட்டோர் நடித்து, கடந்த ஆண்டு வெளியான திரைப்படம், மாமன்னன். ரெட் ஜெயண்ட் மூவிஸ் தயாரித்த இப்படத்திற்கு ஏ.ஆர்.ரஹ்மான் இசையமைத்திருந்தார்.
இப்படம் 50 கோடி ரூபாய்க்கும் மேல் வசூலித்து சாதனை படைத்தது. இந்த படத்தில் நடிகர் வடிவேலு ’மாமன்னன்’ கதாபாத்திரத்திலும், பகத் பாசில் ‘ரத்தினவேல்’ கதாபாத்திரத்திலும் நடித்து இருந்தனர். இதில் இருவரின் நடிப்பும் பெரிதும் பேசப்பட்டது. மேலும் இருவரும் இணைந்து நடித்த காட்சிகளை ரசிகர்கள் சமூக வலைத்தளங்களில் கொண்டாடி வந்தனர்.
இந்நிலையில், மாமன்னன் கூட்டணி மீண்டும் இணைந்துள்ளது. இந்த முறை தமிழ் சினிமாவின் முன்னணி தயாரிப்பு நிறுவனமான சூப்பர் குட் பிலிம்ஸ் தயாரிப்பில் இந்த கூட்டணி இணைந்து நடிக்கிறார்கள். ஆர்.பி சவுத்ரியின் சூப்பர் குட் பிலிம்ஸ் தயாரிக்கும் 98வது படம் இதுவாகும்.