ஷாருக்கான் உடன் மோதும் பிரபாஸ்.. பாக்ஸ் ஆபிஸ் வசூலில் முந்தப்போவது யார்?

This week movie releases: கோலிவுட்டில் இந்த வாரம் திரையரங்குகளில் சலார், டன்கி, சபா நாயகன் உள்ளிட்ட 9 படங்கள் வெளியாக வரிசை கட்டியுள்ளன.

சென்னை: கோலிவுட்டில் இந்த வாரம் பல்வேறு மொழித் திரைப்படங்கள் வெளியாகிறது. ஷாருக்கான் நடித்துள்ள டன்கி, மோகன்லால் நடிப்பில் நெரு, அக்வாமேன் உள்ளிட்ட படங்கள் நாளை (டிச.21) வெளியாகிறது. பிரபாஸ் நடிப்பில் சலார், அசோக் செல்வனின் சபா நாயகன், நடிகை ரேகா நடித்துள்ள மிரியம்மா, விதார்த் நடித்துள்ள ஆயிரம் பொற்காசுகள், ஜிகிரி தோஸ்த், அரணம் உள்ளிட்ட 6 படங்கள் நாளை மறுநாள் (டிச.22) வெளியாகிறது.

கடந்த 2018ஆம் ஆண்டு அக்வாமேன் என்ற ஹாலிவுட் திரைப்படம் வெளியாகி நல்ல வரவேற்பைப் பெற்றது. இந்நிலையில், அதன் இரண்டாம் பாகமான டிசி யுனிவர்ஸின் 'அக்வாமேன் அண்ட் தி லாஸ்ட் கிங்டம் (Aquaman and the last kingdom)' பெரும் எதிர்பார்ப்போடு நாளை திரைக்கு வருகிறது. தமிழ், தெலுங்கு, இந்தி உள்ளிட்ட மொழிகளிலும் இப்படம் வெளியாக உள்ளது.

டன்கி (dunki): ஜவான் திரைப்படத்தின் மாபெரும் வெற்றிக்குப் பிறகு ஷாருக்கான் நடித்துள்ள திரைப்படம் டன்கி. 3 இடியட்ஸ், பிகே, சஞ்சு உள்ளிட்ட படங்களை இயக்கிய ராஜ்குமார் ஹிரானி, டன்கி படத்தை இயக்கியுள்ளார். ஷாருக்கான் உடன் முக்கிய கதாபாத்திரத்தில் டாப்ஸி நடித்துள்ளார். மிகப்பெரும் பொருட்செலவில் தயாராகியுள்ள டன்கி நாளை திரைக்கு வருகிறது.

நெரு (Neru): திரிஷ்யம் திரைப்பட வெற்றிக் கூட்டணியான மோகன்லால், ஜீத்து ஜோசப் இணைந்து உருவாக்கியுள்ள புதிய திரைப்படம் நெரு. கோர்ட் ரூம் டிராமாவாக உருவாகியுள்ள நேரு படத்தில் மோகன்லால், ப்ரியாமணி ஆகியோர் முக்கிய கதாபாத்திரத்தில் நடித்துள்ளனர். இப்படம் நாளை திரைக்கு வருகிறது.

சலார் (Salaar): கே.ஜி.எஃப் முதல் மற்றும் இரண்டாம் பாகத்திற்கு பிறகு பிரசாந்த் நீல் இயக்கியுள்ள திரைப்படம், சலார். பாகுபலி மூலம் உலகளவில் பிரபலமான பிரபாஸ் நாயகனாகவும், அவருக்கு இணையாக முக்கிய கதாபாத்திரத்தில் பிருத்விராஜ் நடித்துள்ளார்.

ஸ்ருதிஹாசன், ஜெகபதி பாபு, பாபி சிம்ஹா, ஜான் விஜய், ஸ்ரேயா ரெட்டி உள்ளிட்ட பலர் நடித்துள்ளனர். தமிழ், தெலுங்கு, இந்தி, கன்னடம், மலையாளம் ஆகிய மொழிகளில் (டிச.22) நாளை மறுநாள் திரைக்கு வருகிறது. சலார் திரைப்படம் ஐமேக்ஸ் தொழில்நுட்பம் உள்ள திரையரங்குகளிலும் வெளியாகிறது.

சபா நாயகன்: போர் தொழில் வெற்றிக்குப் பிறகு அசோக் செல்வன் நடிப்பில் வெளியாகவுள்ள திரைப்படம், சபா நாயகன். சி.எஸ் கார்த்திகேயன் இயக்கத்தில் மேகா ஆகாஷ், கார்த்திகா உள்ளிட்ட பலர் இப்படத்தில் நடித்துள்ளனர். லியோன் ஜேம்ஸ் இசையமைத்துள்ள சபா நாயகன் நாளை மறுநாள் (டிச.22) திரைக்கு வருகிறது.

மிரியம்மா: அறிமுக இயக்குநர் மாலதி நாராயணன் இயக்கத்தில் 20 ஆண்டுகளுக்குப் பிறகு கதையின் நாயகியாக நடிகை ரேகா நடித்துள்ள திரைப்படம், மிரியம்மா. அனிதா சம்பத், வி.ஜே.ஆஷிக் ஆகியோர் இப்படத்தில் நடித்துள்ளனர். மேலும், படத்தின் இயக்குநரும் முக்கியமான கதாபாத்திரத்தில் நடித்துள்ளார். உறவுகள் பின்னணியில் உருவாகியுள்ள இப்படம் நாளை மறுநாள் திரைக்கு வருகிறது.

ஆயிரம் பொற்காசுகள்: ரவி முருகையா இயக்கத்தில் விதார்த், பருத்திவீரன் சரவணன், அருந்ததி நாயர் உள்ளிட்ட பலர் நடித்துள்ள ஆயிரம் பொற்காசுகள் திரைப்படம், நாளை மறுநாள் திரைக்கு வருகிறது. காமெடி டிராமாவாக உருவாகியுள்ள இப்படத்தின் முதல் நாள் முதல் காட்சிக்கு ஒரு டிக்கெட் வாங்கினால் ஒரு டிக்கெட் இலவசம் என்ற அறிவிப்பை சமீபத்தில் படத் தயாரிப்பு நிறுவனம் வெளியிட்டிருந்தது. இது தவிர ஜிகிரி தோஸ்த், பாடலாசிரியர் பிரியன் இயக்கி நடித்துள்ள அரணம் உள்ளிட்ட படங்கள் டிசம்பர் 22ஆம் தேதி திரைக்கு வருகிறது.

இதையும் படிங்க:'தளபதி 68’ படத்தின் தலைப்பு என்ன? சஸ்பென்ஸ் உடைத்த அர்ச்சனா கல்பாத்தி!