ஹைதராபாத்: கன்னட சினிமாவில் ஹோம்பேல் பிலிம்ஸ் தயாரிப்பில் ரிஷப் ஷெட்டி இயக்கி, நடித்த திரைப்படம் காந்தாரா. இத்திரைப்படம் கடந்த 2022ஆம் ஆண்டு கன்னடம், தமிழ், தெலுங்கு உள்ளிட்ட பல மொழிகளில் வெளியாகி நாடு முழுவதும் மிகப்பெரும் வரவேற்பை பெற்றது. காந்தாரா, பஞ்சுர்லி தெய்வத்தின் பின்னணி கொண்ட கதையாக உருவாக்கப்பட்டது.
16 கோடி ரூபாய் பட்ஜெட்டில் உருவாக்கப்பட்ட காந்தாரா திரைப்படம், உலக அளவில் 400 கோடி ரூபாய் வரை வசூல் செய்து சாதனை படைத்தது. கேஜிஃப் படத்திற்கு பிறகு காந்தாரா திரைப்படம் கன்னட சினிமாவிற்கு ஒரு தனி அடையாளத்தை பெற்றுத் தந்தது. காந்தாரா படத்தின் கிளைமாக்ஸ் மிகப்பெரும் வரவேற்பை பெற்றது.
'கருட காமன ரிஷப வாகன' என்ற கன்னட திரைப்படம் மூலம் ரிஷப் ஷெட்டி இந்திய அளவில் அறியப்பட்டாலும், காந்தாரா படம் மூலம் ரிஷப் ஷெட்டி மிகவும் பிரபலமடைந்தார். இதனையடுத்து காந்தாரா திரைப்படம் வெளியாகி 100வது நாளில் காந்தாரா 2ஆம் பாகத்தின் அறிவிப்பு வெளியிடப்பட்டது.