மணிரத்னம், கமல்ஹாசன் கூட்டணியில் உருவாகும் 'Thug Life' - ப்ரோமோ வீடியோ வெளியீடு!

Kamal Haasan 234 movie Thug Life: மணிரத்னம் இயக்கத்தில் கமல்ஹாசன் நடிக்கும் படத்திற்கு Thug Life என தலைப்பிடப்பட்டுள்ளது

ஹைதராபாத்:நாளை நடிகர் கமல்ஹாசனின் 69வது பிறந்தநாளை முன்னிட்டு மணிரத்னம் இயக்கத்தில் கமல்ஹாசன் நடிக்கவுள்ள 234வது படத்தின் தலைப்பு அறிவிப்பு வீடியோவை படக்குழு வெளியிட்டுள்ளது. மணிரத்னம் கமல்ஹாசன் இணையும் படத்திற்கு thug life எனத் தலைப்பிடப்பட்டுள்ளது.

இந்த படத்தை மெட்ராஸ் டாக்கீஸ், ராஜ்கமல் ஃபிலிம்ஸ், ரெட் ஜெயன்ட் மூவீஸ், மகேந்திரன், சிவா ஆனந்த் ஆகியோர் இணைந்து தயாரிக்கின்றனர். மேலும் இந்த படத்தில் த்ரிஷா, துல்கர் சல்மான், ஜெயம் ரவி ஆகியோர் முக்கிய கதாபாத்திரத்தில் நடிக்கின்றனர். ஏ.ஆர்.ரஹ்மான் இசையமைக்கும் இந்த படத்திற்கு ரவி.கே.சந்திரன் ஒளிப்பதிவு பணியை மேற்கொள்கிறார். ஸ்ரீரிகர் பிரசாத் படத்தொகுப்பும், அன்பறிவ் சண்டைக் காட்சிகளையும் கையாள்கின்றனர்.

கமல்ஹாசன், மணிரத்னம் கூட்டணி நாயகன் படத்திற்குப் பிறகு 35 ஆண்டுகளுக்குப் பிறகு இந்த படத்தில் இணைகின்றனர். இந்த கூட்டணி நாயகன் என்ற கிளாசிக் படத்திற்குப் பிறகு தற்போது பல நட்சத்திர நடிகர்களுடன் இணைவதால் ரசிகர்களிடையே பெரும் எதிர்பார்ப்பை ஏற்படுத்தியுள்ளது. இந்த படம் கேங்ஸ்டர் சம்பந்தப்பட்ட கதை எனவும் கூறப்படுகிறது.

கமல்ஹாசனுடன் இணைவது குறித்து சமீபத்தில் பேசிய மணிரத்னம், “கமல்ஹாசன் போன்ற சூப்பர் ஸ்டாருடன் இணைவதில் மிகவும் மகிழ்ச்சி அடைகிறேன். கமலின் திறமை கதாபாத்திரத்தை மேம்படுத்தும். அது மட்டுமில்லாமல் இயக்குநரின் பணியை எளிதாக்குவார். மேலும் கமல் திரைக்கதை அமைப்பதிலும் நிறைய ஐடியாக்களை வழங்குவார்” எனக் கூறியுள்ளார்.

மேலும் கமல்ஹாசன் இயக்குநர் ஹெச்.வினோத் இயக்கத்தில் தனது 233வது படத்திலும் நடிக்கவுள்ளார் என்பது குறிப்பிடத்தக்கது. முன்னதாக ஷங்கர் இயக்கத்தில் கமல்ஹாசன் நடித்துள்ள இந்தியன் 2 படத்தின் ப்ரோமோ வீடியோ வெளியானது.

இதையும் படிங்க:"நீங்கள் திரையில் சாதித்தத்தை, அரசியலிலும் சாதிக்க முடியும்" கமல்ஹாசனுக்கு வாழ்த்து தெரிவித்த சிவகுமார்..!