சென்னை: தமிழ் சினிமாவைப் பொறுத்தவரையில் இந்த 2023ஆம் ஆண்டு மிக அருமையான ஆண்டு என்றே சொல்லலாம். மிகப் பெரிய நடிகர்களின் படங்கள் அதிகமான வசூலை குவித்தன. குறிப்பாக ரஜினி, விஜய், அஜித் உள்ளிட்டவர்களின் படங்கள் நல்ல வசூலைக் கொடுத்தன.
ஆனால் சற்றும் எதிர்பாராத வகையில் அறிமுக இயக்குநர்கள் பலர் இந்த 2023-இல் தமிழ் சினிமா ரசிகர்களை அதிக அளவில் கவனம் ஈர்த்தனர். வித்தியாசமான கதை, கதை சொல்லும் விதம், அருமையான திரைக்கதை என தனது முதல் படத்திலேயே முத்திரை பதித்தனர்.
கணேஷ் கே பாபு:கவின், அபர்ணா தாஸ் நடிப்பில் இந்த ஆண்டு பிப்ரவரி 10ஆம் தேதி வெளியான திரைப்படம் 'டாடா'. இப்படத்தை அறிமுக இயக்குநர் கணேஷ் கே பாபு இயக்கி இருந்தார். காமெடி கலந்த காதல் படமாக உருவாகி இருந்தது, இப்படம்.
விடலைப் பருவ காதலும், அதன் பிறகான வாழ்க்கைப் பொறுப்பும் பற்றி இப்படம் பேசியது. சிங்கிள் ஃபாதராக கவின் தனது நடிப்புத் திறமையை நன்றாக வெளிப்படுத்தியிருந்தார். ஜாலியான கதையில் ஆங்காங்கே சென்டிமென்ட் காட்சிகளை வைத்து கிளைமாக்ஸ் காட்சியில் ரசிகர்களை உருக வைத்திருப்பார், இயக்குநர். மிகக்குறைந்த முதலீட்டில் எடுக்கப்பட்ட இப்படம் நல்ல வசூலைப் பெற்றது.
ஆர்.மந்திரமூர்த்தி:இந்த ஆண்டில் மிகவும் கொண்டாடப்பட்ட படங்களில் மிக முக்கியமான படம், அயோத்தி. சசிகுமாருக்கு நீண்ட இடைவெளிக்குப் பிறகு காலத்துக்கும் பெயர் சொல்லும் படமாக அயோத்தி அமைந்தது. சக மனிதன் மீது அன்பு செலுத்த வேண்டும் என்பதை எந்தவித பிரச்சார நெடியும் இல்லாமல், இயல்பான கதை சொல்லல் முறையில் கவனம் ஈர்த்தார், அறிமுக இயக்குநர் மந்திரமூர்த்தி.
இந்தியாவின் எங்கோ ஒரு மூலையில் இருந்து தமிழ்நாடு வரும் வட இந்திய குடும்பத்துக்கு ஏற்படும் பிரச்னையை, தமிழகத்தின் ஒரு ஊரில் இருக்கும் ஒருவர் தீர்த்துவைக்கும் கதையில் அன்பு, மனிதம், இரக்கம், அரசியல் என அனைத்து உணர்வுகளையும் புகுத்தி ,இறுதியில் நம்மைக் கண்கலங்கச் செய்தார் இயக்குநர். நிச்சயம் இந்த ஆண்டின் வெளியான படங்களில் சிறந்த படம் 'அயோத்தி' என்று சொல்லலாம்.
விநாயக் சந்திரசேகரன்: குறட்டை விடுவது எல்லாம் ஒரு பிரச்சினையா என்று கேட்பவர்கள் உண்டு. அப்படி அந்த சாதாரண குறட்டை பிரச்சினையைக் கருவாக வைத்து குட்நைட் படம் மூலம் வென்றிருந்தார், அறிமுக இயக்குநர் விநாயக் சந்திரசேகரன். படத்தில் அத்தனை கதாபாத்திரங்களும் அவ்வளவு இயல்பாக நடித்திருந்தனர்.
விக்னேஷ் ராஜா:தமிழ் சினிமாவில் இந்த ஆண்டு மட்டும் க்ரைம் த்ரில்லர் படங்கள் நிறைய வந்துள்ளன. ஆனால் விக்னேஷ் ராஜா இயக்கத்தில் இந்த ஆண்டு வெளியான 'போர் தொழில்' திரைப்படம், மற்ற க்ரைம் த்ரில்லர் படங்களிலிருந்து முற்றிலும் மாறுபட்டு இருந்தது. இதுதான் இப்படத்தின் வெற்றிக்குக் காரணமாகவும் அமைந்தது.
தொடர் கொலை நடக்கிறது, அதை யார் செய்திருப்பார்கள் என விரியும் காவல்துறை விசாரணை என வழக்கமான கதைதான். ஆனால், அதனை திரைக்கதையாக படமாக்கிய விதத்தில், ரசிகர்களை சீட்டின் நுனியில் அமரச் செய்தார், இயக்குநர் விக்னேஷ் ராஜா. சரத்குமார், அசோக் செல்வன், சரத் பாபு ஆகியோரின் நடிப்பு படத்திற்கு மிகப்பெரிய பலமாக அமைந்தது.
ராம் சங்கையா:கிராமத்து மக்களின் வெள்ளந்தி மனதையும், அவர்களது வாழ்வியலையும் நகைச்சுவை கலந்து சொல்லிய படம்தான் தண்டட்டி. கிராமங்களில் வயதான பாட்டிகள் தங்களது காதில் மாட்டியுள்ள மிகப்பெரிய கம்மல் தான் தண்டட்டி. இதனை வைத்து ஒரு அழுத்தமான கதையை நகைச்சுவையோடு இயல்பாக கொடுத்திருந்தார், இயக்குநர் ராம் சங்கையா.
அருள் செழியன்:குடியிருந்த கோயில் என்பதன் சுருக்கமே 'குய்கோ'. மகன் வெளிநாட்டில் இருக்க, இறந்து போன அம்மாவை ப்ரீசர் பாக்ஸில் வைக்கின்றனர். மகன் வந்து அம்மாவுக்கு இறுதிச் சடங்கை செய்துவிட்டு அவர் வைக்கப்பட்டு இருந்த ப்ரீசர் பாக்ஸை குடியிருந்த கோயிலாகக் கும்பிடுகிறான்.
இந்த கதையில் பிழைப்புக்காக வெளிநாடு செல்பவர்களின் வலி, வெளிநாடு சென்று வந்தவருக்கு ஊருக்குள் இருக்கும் மரியாதை மற்றும் காதல், அரசியல் பகடி என சகலத்தையும் கலந்து கட்டி சுவாரஸ்யமான படமாக கொடுத்திருந்தார், இயக்குநர் அருள் செழியன்.
ராம்குமார் பாலகிருஷ்ணன்:இந்த ஆண்டு இறுதியில் வெளியான படம் 'பார்க்கிங்'. இந்த கதை சாதாரணமாக அனைவரது வாழ்க்கையிலும் நிச்சயம் நடந்திருக்கும் அல்லது தினமும் நடந்து கொண்ட இருக்கும். வீட்டில் யார் கார் முதலில் நிறுத்துவது என்று வாடகைக்கு குடியிருக்கும் இரண்டு குடும்பங்களின் பிரச்சினையே இப்படம்.
சாதாரண பார்க்கிங் பிரச்சினை கொலை செய்யும் அளவிற்குப் போகுமா என்று கேட்போருக்கு, ஆம் போகும் என நம்ப வைத்தது இதன் திரைக்கதை. நடிகர் எம்.எஸ்.பாஸ்கரின் நடிப்புத் திறமைக்கு மிகப்பெரிய தீனி போட்டது இப்படம். இரண்டு நபர்களின் ஈகோவை சற்றும் குறையில்லாத வகையில் படம்பிடித்துக் காட்டியது 'பார்க்கிங்' திரைப்படம்.
ரா வெங்கட்:தீபாவளிக்கு தனது பேரனுக்கு புதுத்துணி எடுத்துத் தர முடியாத தாத்தாவின் போராட்டமே 'கிடா'. அதை துளியும் சினிமாத்தனம் இல்லாமல் சொல்லிய விதத்தில், இந்த ஆண்டு கவனம் ஈர்த்தார் இயக்குநர் ரா வெங்கட்.
எல்லோரும் நல்லவர்களே என்று காட்டியது, சினிமாத்தனமான க்ளிஷே காட்சிகளைத் தவிர்த்தது, கிளைமாக்ஸ் காட்சியில் சிறுவன் செய்யும் செயல் என காட்சிக்கு காட்சி மனித உணர்வுகளை அப்பட்டமாக காட்சிப்படுத்தியிருந்தார் இயக்குநர் ரா வெங்கட். காளி வெங்கட், பூ ராமு உள்ளிட்டோரின் நடிப்பும் படத்தின் நம்பகத்தன்மையை இழக்கவிடாமல் செய்தது.
இதையும் படிங்க:பிரபல ஓடிடி-யில் வெளியானது ஹரிஷ் கல்யாணின் பார்க்கிங் திரைப்படம்..!
